2026 թվականին Եվրասիական տնտեսական միության (ԵԱՏՄ) մարմիններում նախագահությունը Բելառուսից կանցնի Ղազախստանին։ Աստանան մտադիր է օգտագործել այս ժամանակահատվածը եվրասիական տնտեսական ինտեգրման խորացման, թվային տեխնոլոգիաների զարգացման և տնտեսության ու պետական կառավարման առանցքային ոլորտներում արհեստական բանականության ներդրման համար։
Կենտրոնական առաջնահերթություններից մեկը կլինի «Ղազախստանը արհեստական բանականության դարաշրջանում» հայեցակարգը։ Ծրագրվում է արտադրական գործընթացներում ԱԲ-ի ակտիվ ներդրում, բիզնեսի արդյունավետության բարձրացում և պետական կառավարման համակարգի օպտիմալացում՝ թվային լուծումների հաշվին։
Նախագահության շրջանակներում Ղազախստանը մի շարք առանցքային միջոցառումներ կանցկացնի։ Եվրասիական տնտեսական բարձրագույն խորհրդի նիստը նախատեսված է անցկացնել Աստանայում՝ 2026 թվականի մայիսի 28-29-ին։ Ակնկալվում է նաև Եվրասիական միջկառավարական խորհրդի հանդիպումը Շիմկենտում, որտեղ կքննարկվեն ԵԱՏՄ անդամ երկրների համագործակցության արդիական հարցերը։
Հատուկ ուշադրություն կդարձվի ձեռնարկատիրական համայնքի հետ փոխգործակցությանը: 2026 թվականին Ղազախստանի Հանրապետության «Ատամեկեն» ձեռնարկատերերի ազգային պալատը կգլխավորի ԵԱՏՄ Գործարար խորհուրդը, ինչը պետք է ուժեղացնի բիզնեսի դերը ինտեգրացիոն գործընթացներում:
Աստանայում ակնկալում են, որ Ղազախստանի նախագահությունը նոր թափ կհաղորդի Եվրասիական տնտեսական միության զարգացմանը և կնպաստի ինտեգրացիոն օրակարգի արդիականացմանը:
