ԱՄՆ-ը տեղեկացրել է ավիաընկերություններին, որ Կարիբյան ավազանի օդային տարածքի սահմանափակումները կավարտվեն կեսգիշերին՝ արևելյան ժամանակով (05:00 GMT), և թռիչքները կարող են վերսկսվել՝ ըստ ժամանակացույցի օպերատիվ թարմացումների։ Այս մասին շաբաթ օրը հայտարարել է տրանսպորտի նախարար Շոն Դաֆին, տեղեկացնում է Reuters-ը։
Ըստ լրատվամիջոցի, ԱՄՆ-ի հարձակման և Վենեսուելայի նախագահ Նիկոլաս Մադուրոյի ձերբակալման հետևանքով միջազգային ավիաընկերությունները չեղարկել են հարյուրավոր չվերթներ։
Խոշոր փոխադրողներ United Airlines-ը և Delta-ն պատրաստվում են կիրակի օրվանից վերսկսել թռիչքները Կարիբյան երկրներ։
Այնուամենայնիվ, նույնիսկ սահմանափակումների վերացումից հետո ավիաընկերություններին մի քանի օր կպահանջվի նորմալ աշխատանքը վերականգնելու համար, նշել է ավիաընկերությունների վերլուծաբան Ռոբերտ Մանը՝ հավելելով, որ «իրենք դեռ մեկ օրվա ուղևորներ ունեն», որոնք մնացել են Կարիբյան ավազանում։
American Airlines, Delta, United, Frontier Airlines, Spirit Airlines և JetBlue Airways ընկերությունները չեղարկել էին թռիչքները՝ ԱՄՆ Դաշնային ավիացիոն վարչության (FAA) կողմից Կարիբյան ավազանի օդային տարածքի փակման պատճառով։ JetBlue-ն չեղարկել է 215 չվերթ, հայտնել է ընկերության ներկայացուցիչը։ FAA-ն իր ծանուցագրում նշել է, որ փակել է օդային տարածքը ամերիկյան փոխադրողների համար «թռիչքների անվտանգության հետ կապված ռիսկերի պատճառով, որոնք պայմանավորված են շարունակվող ռազմական գործողություններով»։
