ԱՄՆ պետքարտուղարությունը կասեցրել է ներգաղթային մուտքի արտոնագրերի տրամադրումը բազմազանության արտոնագրի (գրին քարտ) խաղարկության շրջանակում։ Այս մասին հայտնում են ՀՀ-ում ԱՄՆ դեսպանատնից։
Հաղորդագրության մեջ նշվում է, որ DV-2027 ծրագրի վերաբերյալ այս պահին նոր հայտարարություններ առկա չեն։
Որոշումն ընդունվել է Բրաունի համալսարանում տեղի ունեցած հրաձգության և Մասաչուսեթսի տեխնոլոգիական ինստիտուտի (MIT) պրոֆեսորի սպանության դեպքերից հետո, որոնցում կասկածվում է DV ծրագրով ԱՄՆ մուտք գործած անձը:
ԱՄՆ պետքարտուղարությունից հայտնում են, որ այս դադարը թույլ կտա վերանայել ծրագրի ստուգման և զտման ընթացակարգերը (vetting protocols): Նպատակն է բացահայտել գործընթացի խոցելի կողմերը և երաշխավորել, որ վիզա ստացողները սպառնալիք չեն ներկայացնում ԱՄՆ ազգային անվտանգության կամ հասարակական անվտանգության համար:
Ըստ նոր ուղեցույցի՝ դիմորդները կարող են շարունակել ներկայացնել հայտեր և հաճախել հարցազրույցների, սակայն որևէ վիզա չի տրամադրվելու: Արդեն նշանակված հարցազրույցները չեն չեղարկվի:
Պետքարտուղարությունը հստակեցրել է նաև, որ սույն որոշումը չի չեղարկում արդեն իսկ տրամադրված վավեր վիզաները:
