1lurer.am Թուրքական կողմը վերականգնում է «Ալիջանի» անցակետը: Ովքեր չգիտեն՝ մեր կողմից Մարգարայի անցակետն է, իրենց կողմից՝ «Ալիջանի»: Այս մասին խորհրդարանում լրագրողների հետ զրույցում ասաց ՀՀ ԱԺ նախագահի տեղակալ Ռուբեն Ռուբինյանը՝ խոսելով հայ-թուրքական գործընթացի մասին:
«Ինչ վերաբերում է հետագա զարգացումներին, թույլ տվեք հիմա բան չասել: Ժամանակը կգա, պատշաճ ձևով կտեղեկացվեք»,- ասաց Ռուբինյանը՝ ընդգծելով՝ ինքն ուզում է հայտնել մի բան, երբ այն տեղի կունենա:
Ինչ վերաբերում է պայմանավորվածություններին, ասաց՝ այն կա դեռևս 2022 թվականից, որ պետք է երրորդ երկրներից և դիվանագիտական անձնագրեր ունեցողների համար սահմանը բացվի:
«Այլ բան հիմա թույլ տվեք չասել: Միայն կասեմ այն, որ հրապարակային է, և տեսել եք, որ թուրքական կողմը վերականգնում է «Ալիջանի» անցակետը: Հայաստան-Թուրքիա կարգավորման գործընթացում իմ փորձը ցույց է տալիս, որ ավելի լավ է սպասել, որ ինչ-որ բան լինի, այդ ժամանակ հայտարարեմ»,- նշեց Ռուբինյանը՝ ընդգծելով՝ չի ցանկանում վնասել գործընթացին:
Նրա խոսքով՝ մեր դիրքորոշումը մշտապես այն է եղել, որ ուզում ենք ունենալ ամբողջապես բաց սահմաններ և հաստատված դիվանագիտական հարաբերություններ՝ հենց վաղը:
«Այս առումով մեր դիրքորոշման մեջ բան չի փոխվել»,- ասաց նա:
Լրագրողների դիտարկմանը, թե թուրքական կողմը շարունակում է երկու երկրների հարաբերությունների կարգավորումը կապել հայ-ադրբեջանական հարաբերությունների ամբողջական կարգավորման հետ, ԱԺ նախագահի տեղակալը ասաց՝ այդ առումով ևս մեր դիրքորոշման մեջ փոփոխություն տեղի չի ունեցել:
«Հայաստան-Թուրքիա հարաբերությունների կարգավորման գործընթացը և Հայաստան-Ադրբեջան գործընթացը տարբեր գործընթացներ են, բայց բնականաբար, քանի որ նույն տարածաշրջանում ենք, կարող են փոխազդել միմյանց վրա: Մենք կարծում ենք, որ Հայաստան-Թուրքիա կարգավորման գործընթացում առաջընթացը ոչ միայն չի վնասի ՀՀ-Ադրբեջան գործընթացին, այլ նաև կօգնի և նոր ազդակներ կտա: Բացի դա՝ չեք կարող նաև չնկատել, որ Հայաստան-Ադրբեջան գործընթացում ահռելի առաջընթաց կա՝ օգոստոսի 8-ի հռչակագիրը խաղաղության վերաբերյալ, երկաթգծի՝ առնվազն մասնակի ապաշրջափակումը և այսպես շարունակ»,- նշեց Ռուբինյանը:
Նրա խոսքով՝ գործընթացները բոլորը գնում են դրական ուղղությամբ՝ որոշ արդյունքներ արդեն տեսանելի են, որոշները տեսանելի կլինեն ավելի ուշ:
