armenpress.am Դանիան և Գրենլանդիան քննարկել են Գրենլանդիայում և Արկտիկայում ՆԱՏՕ-ի առաքելություն ունենալու հնարավորությունը, հայտարարել է Դանիայի պաշտպանության նախարար Տրոլս Լունդ Պոուլսենը։ Այս մասին հաղորդում է Reuters գործակալությունը։
Պոուլսենը ելույթ է ունեցել Բրյուսելում ՆԱՏՕ-ի գլխավոր քարտուղար Մարկ Ռյուտեի և Գրենլանդիայի արտաքին գործերի նախարար Վիվիան Մոտցֆելդտի հետ հանդիպումից հետո։
«Մենք առաջարկել ենք սա։ ՆԱՏՕ-ի գլխավոր քարտուղարը նույնպես սա ընդունել է ի գիտություն, և ես կարծում եմ, որ մենք այժմ կարող ենք, հուսով եմ, ստեղծել շրջանակ, թե ինչպես կարելի է դրան հասնել», – ասել է Պոուլսենը։
«Սա նաև համապատասխանում է այն ամենին, ինչ մենք քննարկել ենք Գրենլանդիայի կառավարության հետ», – հավելել է նա։
Իր հերթին, ՆԱՏՕ-ի գլխավոր քարտուղար Մարկ Ռյուտեն հանդիպումից հետո հայտարարել է, որ Դաշինքը կշարունակի աշխատել Դանիայի և Գրենլանդիայի հետ՝ Արկտիկայի տարածաշրջանում անվտանգության ամրապնդման ուղղությամբ։
Եվրոպական 8 երկիր արդեն իսկ զինվորականներ են ուղարկել Դանիայի կազմի մեջ մտնող Գրենլանդիա՝ «Արկտիկական դիմացկունություն» զորավարժություններին մասնակցելու։
ԱՄՆ նախագահ Դոնալդ Թրամփը սպառնացել է մաքսատուրքեր սահմանել ԵՄ 8 երկրների, մասնավորապես՝ Դանիայի, Նորվեգիայի, Շվեդիայի, Ֆրանսիայի, Գերմանիայի, Նիդեռլանդների, Ֆինլանդիայի և Մեծ Բրիտանիայի նկատմամբ, որոնք զորքեր են ուղարկել Գրենլանդիա և դեմ են դանիական կղզու նկատմամբ ԱՄՆ վերահսկողությանը։
