armenpress.am Եվրոպայի խորհրդին Հայաստանի Հանրապետության անդամակցությունից ի վեր կազմակերպությունը նշանակալի դեր է խաղացել՝ ժողովրդավարական վերափոխման հույսի, ժողովրդավարության և ժողովրդավարական արժեքների նկատմամբ հավատի, ինչպես նաև հայ հասարակության և պետականության մեջ դրանց վերջնական ներդրման գործում։
Այս մասին հայտարարել է Հայաստանի Հանրապետության արտաքին գործերի նախարար Արարատ Միրզոյանը` ելույթ ունենալով Եվրոպայի խորհրդի խորհրդարանական վեհաժողովի նստաշրջանում։
ԱԳ նախարարը շեշտել է, որ մեծ պատիվ է ելույթ ունենալ Եվրոպայի խորհրդին Հայաստանի Հանրապետության անդամակցության 25-ամյակի կապակցությամբ։
«Մենք այսօր հավաքվել ենք՝ նշելու Եվրոպայի խորհրդում Հայաստանի խիստ արժեքավոր անդամակցությունը և գնահատելու վերջին տարիներին Հայաստանի կողմից օրենքի գերակայության ապահովման, մարդու իրավունքների և հիմնարար ազատությունների պաշտպանության գործում արձանագրած նշանակալի նվաճումները։ Այս հոբելյանը հնարավորություն է տալիս խորհելու միասին անցած ուղու, մարտահրավերների, համատեղ վճռականության պահերի և համատեղ ջանքերի շնորհիվ հնարավոր դարձած նվաճումների մասին։ Սա նաև հնարավորություն է միասին խորհելու այսօրվա ընդհանուր մարտահրավերների և անորոշությունների մասին, ինչպիսիք են ժողովրդավարությունների վրա թիկունքից հարձակումները, այդ թվում՝ ապատեղեկատվության տարածումը և տեղեկատվական զենքի վերածումը, արտաքին միջամտությունը ներքին ժողովրդավարական գործընթացներին, ինչպիսիք են ընտրությունները, ու, վերջապես, բայց ոչ պակաս կարևոր, միջազգային իրավունքի խաթարումը և բազմաթիվ համակարգերի քայքայումը։ Այս բոլոր արժեքներն ու սկզբունքները քննության են ենթարկվում, և մեր ընդհանուր պատասխանատվությունն է պաշտպանել դրանք ավելի ու ավելի բարդ ու փխրուն միջազգային միջավայրում»,-ասել է Միրզոյանը։
Նրա խոսքով՝ Եվրոպայի խորհրդի 75-ամյա ժառանգությունը, որպես ժողովրդավարության, մարդու իրավունքների և օրենքի գերակայության չափանիշներ սահմանողի, լիազորում է կազմակերպությանը ընդլայնել իր դերը՝ համաշխարհային ժողովրդավարական նահանջի դեմ պայքարելու և միջազգային ճարտարապետության նկատմամբ վստահության վերականգնմանը նպաստելու գործում։
«Հայաստանի անդամակցությունից ի վեր՝ Եվրոպայի խորհուրդը նշանակալի դեր է խաղացել՝ ժողովրդավարական վերափոխման հույսի, ժողովրդավարության և ժողովրդավարական արժեքների նկատմամբ հավատի, ինչպես նաև դրանց վերջնական ներդրման գործում հայկական հասարակության և պետականության մեջ։ Յուրաքանչյուր բարեփոխում, յուրաքանչյուր վավերացված կոնվենցիա, յուրաքանչյուր ինստիտուցիոնալ զարգացում նշանակել է ոչ միայն տեխնիկական փոփոխություն, այլև շոշափելի և գործնական բարելավում սովորական քաղաքացիների կյանքում»,-ընդգծել է ԱԳ նախարարը։
Արարատ Միրզոյանի բնորոշմամբ՝ Մարդու իրավունքների եվրոպական կոնվենցիային Հայաստանի միանալը ներդրել է Մարդու իրավունքների եվրոպական դատարան դիմելու իրավունքը՝ ապահովելով մի վայր, որտեղ քաղաքացիները կարող են արդարություն և արդարադատություն գտնել, եթե պետական իրավական միջոցները բավարար չեն, մահապատժի վերացումը երաշխավորել է կյանքի հիմնարար իրավունքը՝ ապահովելով, որ ոչ մի անձ մահվան չի կարող դատապարտվել, Մարդու իրավունքների պաշտպանի ինստիտուտի ստեղծումը հնարավորություն է տվել անմիջական և անկախ ահազանգ բարձրացնել պետության կողմից կատարված իրավունքների խախտման մասին՝ սովորական մարդկանց տրամադրելով մեխանիզմ իրենց իրավունքների վերականգնում պահանջելու համար՝ առանց երկար դատական վեճերի միջով անցնելու։
ԱԳ նախարարի խոսքով՝ Վենետիկի հանձնաժողովն իր իրավական կարծիքների միջոցով հանդես է եկել որպես հսկող մարմին, որի նպատակն է ապահովել, որ օրենսդրական բարեփոխումները համապատասխանեն միջազգային չափանիշներին, իսկ Կոռուպցիայի դեմ պայքարի պետությունների խումբը՝ ԳՐԵԿՈ-ն, կանոնավոր մոնիթորինգային ճնշում է իրականացնում՝ կաշառակերության դեմ թափանցիկ օրենքներ ներդնելու և կառավարությունների ներսում ազնվություն խթանելու համար։
