1lurer.am «Հայկական ժամանակ» օրաթերթն ինչ-որ մի ժամանակահատվածում եղել է ՀՀ-ի ամենամեծ տպաքանակն ունեցող, ամենամեծ պահանջարկն ունեցող, ընթերցողների ամենալայն զանգվածն ունեցող թերթը: ՀՀ-ում թերթերի տարածման շատ սահմանափակ ռեսուրսներ են եղել, և, բնականաբար, պետք էր այդ ռեսուրսներից օգտվել: Այդ մասին Կառավարության ճեպազրույցի ժամանակ ասաց ՀՀ վարչապետ Նիկոլ Փաշինյանը՝ անդրադառնալով հարցին, թե ժամանակին Միքայել Մինասյանն ինչպես է ֆինանսավորել «Հայկական ժամանակ» թերթը:
Ի տարբերություն մյուս թերթերի՝ «Հայկական ժամանակի» 1 համարի 100 դրամից, ըստ Փաշինյանի, վաճառող ընկերությունն ստացել է 30 դրամ, մյուս թերթերը ստացել են 10, 20, 25 դրամ, հետևաբար Փաշինյանը կարծում է՝ տվյալ դեպքում ոչ թե «Հայկական ժամանակին» են «փող տվել», այլ «Հայկական ժամանակն» է «փող տվել», և որ դա արտահայտված է բազմաթիվ հաշվապահական թղթերում:
««Հայմամուլ» էր կոչվում, թե ինչ էր կոչվում, Հայաստանի բոլոր թերթերը վաճառվել են այդ համակարգի միջոցով: Բացարձակապես բոլոր թերթերը: Միայն «Հայկական ժամանակը» չի ունեցել, էլի են եղել նման պայմանագրեր, բայց եթե նույնիսկ միայն «Հայկական ժամանակն» է ունեցել, «Հայկական ժամանակը» եղել է շուկայի թիվ 1 թերթը, և, բնականաբար, շատերն են ուզեցել պայմանագիր կնքել «Հայկական ժամանակը» վաճառելու և դրա արդյունքում շահույթներ ստանալու:
Հետևաբար «Հայկական ժամանակն» է գումար տվել, ոչ թե «Հայկական ժամանակին» են գումար տվել, և դա արտահայտված է հաշվապահական թղթերում, վճարված հարկերով, հաշվապահական հաշվետվություններով և այդպես շարունակ»,- ասաց Փաշինյանը և հորոդորեց մոնիտորինգ անել՝ պարզելու, որ «Հայկական ժամանակը» նաև չի ունեցել որևէ մարդու մասին չգրելու վերաբերյալ որևէ կաշկանդվածություն:
Հիշեցնենք, որ անցած հարցուպատասխանին՝ հունվարի 21-ին, Աննա Գրիգորյանը, անդրադառնալով Փաշինյանի խոսքերին, հայտարարել էր․ «Հայաստանում մինչ այս պահը միայն մեկ արձանագրված դեպք կա, երբ Միքայել Մինասյանը որևէ մեկին ծրարով փող է տվել, և ցավոք, դա դուք եք»։
Աննա Գրիգորյանը այսպես անդրադարձել էր Փաշինյանի այն հայտարարությանը, թե «ընդդիմության շարքերից շատերը ծրարով գումար են ստացել Վատիկանում նախկին դեսպան, ՀՀ երրորդ նախագահ Սերժ Սարգսյանի փեսա Միքայել Մինասյանից, և հիմա էլ նստած են այս դահլիճում»։
«Այդ ի՞նչ եք դուրս տալիս` ի՞նչ է նշանակում, թե ապացուցված դեպք կա, որ Միշիկը ինձ ծրարով գումար է տվել…Միշիկն էլ է գլուխը պատով տվել, ասողն էլ է պատին տվել, կասկածողն էլ հետը»,– ասել էր Փաշինյանը։
