armenpress.am Ավստրալիայի թագավորական ռազմաօդային ուժերը Նևադայի Նելիս ռազմաօդային բազայում տեղակայել են վեց F-35A Lightning II և մեկ E-7A Wedgetail ինքնաթիռ, ինչպես նաև մոտ 227 օդաչու՝ մասնակցելու աշխարհի ամենաառաջադեմ օդային մարտական ուսուցման երկու վարժանքներին։ Այս մասին հաղորդում է Ավստրալիայի պաշտպանության նախարարությունը։
2026 թվականի փետրվարի 2-ից «Կարմիր դրոշ Նելիս» (Red Flag Nellis) և «Բամբուկե արծիվ» (Bamboo Eagle 26-1) վարժանքները կմիավորեն Ավստրալիայի, ԱՄՆ-ի և Միացյալ Թագավորության օդաչուներին։
«Այս վարժանքներն ապահովում են խիստ իրատեսական ուսումնական միջավայր, որտեղ մենք կարող ենք ինտեգրել տարբեր հնարավորություններ և ամրապնդել մեր կարողությունները՝ գործելու հիմնական դաշնակիցների և գործընկերների հետ», – ասել է Ավստրալիայի զորախմբի հրամանատար Մեթյու Դևեսոնը։
Նա նշել է, որ երկու վարժանքներն էլ մոդելավորում են ժամանակակից սպառնալիքների լայն շրջանակ, ներառյալ օդային, ցամաքային և ծովային հնարավորությունները, ինչպես նաև տիեզերական և կիբեռոլորտային սպառնալիքները։
Նրա խոսքով՝ Ավստրալիայի մասնակցությունն այս զորավարժություններին ամրապնդում է զսպման ուժը, նպաստում տարածաշրջանային անվտանգությանն ու կայունությանը, ինչպես նաև ամրապնդում է երկարատև գործընկերությունները։
«Ավստրալիան առաջին ոչ ՆԱՏՕ-ի անդամ երկիրն էր, որը մասնակցեց «Կարմիր դրոշ Նելիս» զորավարժություններին 1980 թվականին, և մենք մասնակցել ենք «Բամբուկե արծիվ» զորավարժություններին դրանց մեկնարկից՝ 2024 թվականից ի վեր», – ասել է Դևեսոնը։
«Կարմիր դրոշ Նելիս» և «Բամբուկե արծիվ» զորավարժություններն ԱՄՆ-ի և դաշնակիցների ռազմաօդային ուժերի միջև անցկացվող ամենամեծ համատեղ ռազմաօդային զորավարժություններն են, որոնք ուղղված են բարձր տեխնոլոգիական հակամարտություններին նախապատրաստվելուն։
