Երևանի քաղաքապետ Տիգրան Ավինյանն ընդունել է Հայաստանում Քուվեյթի Պետության արտակարգ և լիազոր դեսպան Մուհամմադ Տարեկ Ալի Ալ-Օրայֆանին:
Երևանի քաղաքապետարանից հայտնում են, որ Տիգրան Ավինյանը հետաքրքրություն է հայտնել Երևանի և Էլ Քուվեյթի միջև գործընկերային կապերի հաստատման գործում: Նա ընդգծել է, որ Երևանը կենսունակ և արագ զարգացող մայրաքաղաք է՝ արդիականացման ու նորարարության զգալի ներուժով, և այս համատեքստում կարևորում է գործընկեր քաղաքների հետ քաղաքային ենթակառուցվածքների զարգացման համատեղ ծրագրերի իրագործումն ու խելացի լուծումների մշակումը:
Շնորհակալություն հայտնելով գործակցության պատրաստակամության համար՝ դեսպան Մուհամմադ Տարեկ Ալի Ալ-Օրայֆանը նշել է, որ իր լիազորությունների շրջանակում կանի հնարավորը՝ երկու մայրաքաղաքների միջև հարաբերությունների հաստատման ու գործնական ծրագրերի իրականացման համար:
Հանդիպմանը Երևանի քաղաքապետը դեսպանին է ներկայացրել նաև քաղաքաշինական այն խոշոր նախագծերը, որոնք կարող են ներդրումային հետաքրքրություն առաջացնել:
