Արաբական Միացյալ Էմիրությունների պաշտպանության նախարարությունը պաշտոնապես հայտարարել է, որ երկիրը ենթարկվել է «բացահայտ հարձակման՝ իրանական բալիստիկ հրթիռների կիրառմամբ»։
Հայտարարության մեջ նշվում է, որ հրթիռի բեկորներն ընկել են Աբու Դաբիի բնակելի թաղամասի վրա, ինչի արդյունքում կա մեկ զոհ։
«ԱՄԷ-ն իրեն իրավունք է վերապահում արձագանքել այս սրացմանը և ձեռնարկել բոլոր անհրաժեշտ միջոցները՝ իր տարածքը, քաղաքացիներին և բնակիչներին պաշտպանելու համար»,- ասվում է նախարարության հայտարարության մեջ։
Սաուդյան Արաբիայի արտաքին գործերի նախարարությունը դատապարտել է «Իրանի բացահայտ ագրեսիան» և լիակատար զորակցություն հայտնել ԱՄԷ-ին, Բահրեյնին, Կատարին, Քուվեյթին և Հորդանանին։
Նախարարությունը նաև զգուշացրել է լուրջ հետևանքների մասին, եթե շարունակվեն «միջազգային իրավունքի նման խախտումները»։
Կատարի պաշտպանության նախարարությունը Իրանի հարվածներն անվանել է իր ինքնիշխանության «բացահայտ խախտում» և հայտարարել, որ իրենց զինված ուժերը հաջողությամբ հետ են մղել հարձակումների երկրորդ ալիքը։
Գերատեսչությունից նշել են, որ Կատարը մշտապես կոչ է արել Իրանի հետ երկխոսության, և որ երկրի վրա հարձակումները «որևէ արդարացումով կամ պատրկվակով ընդունելի չեն», քանի որ այն միշտ հեռու է մնացել տարածաշրջանային հակամարտություններից։
