Չինաստանի արտաքին գործերի նախարար Վան Ին կիրակի Ռուսաստանի արտաքին գործերի նախարար Սերգեյ Լավրովին ասել է, որ ԱՄՆ-Իրան բանակցությունների ընթացքում Իրանի վրա ԱՄՆ-ի և Իսրայելի հարձակումներն «անընդունելի» են, ըստ պետական «Սինհուա» լրատվական գործակալության։

Վանը նշել է, որ «ինքնիշխան առաջնորդի բացահայտ սպանությունը» և ռեժիմի փոփոխության հրահրումը անընդունելի են՝ հայտնել է Ռոյթերս գործակալությունը։

Նախարարը նշել է, որ Չինաստանը կոչ է անում անհապաղ դադարեցնել ռազմական գործողությունները, հնարավորինս շուտ վերադառնալ երկխոսությանը և բանակցություններին, ինչպես նաև խուսափել հետագա սրացումից։

Շաբաթ Չինաստանի նախարարությունը մտահոգություն է հայտնել հարվածների վերաբերյալ և կոչ է արել անհապաղ դադարեցնել կրակը՝ հորդորելով բոլոր կողմերին խուսափել իրավիճակի սրացումից և վերսկսել երկխոսությունն ու բանակցությունները։

Այն նշել է, որ Իրանի ինքնիշխանությունը, անվտանգությունը և տարածքային ամբողջականությունը պետք է հարգվեն։

Կիրակի Չինաստանի պետական «Սինհուա» լրատվական գործակալությունը քննադատել է հարձակումը՝ այն անվանելով «ինքնիշխան ազգի դեմ անամոթ ագրեսիա» և «ուժի քաղաքականություն և գերիշխանություն»։

«Սինհուա»-ն նշել է, որ Վաշինգտոնի կողմից ռազմական հարկադրանքի կիրառումը ՄԱԿ-ի կանոնադրության նպատակների և սկզբունքների «կոպիտ խախտում» է և շեղում «միջազգային հարաբերությունների հիմնարար նորմերից»։

Փետրվարի 28-ի առավոտյան Իսրայելը օդային հարվածներ է հասցրել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով»։ Իսրայելի սկսած ռազմական գործողությանը միացել է նաեւ ԱՄՆ-ն։ Միացյալ Նահանգների նախագահ Դոնալդ Թրամփը հայտարարել է, որ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։

Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։

Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։