armenpress.am Կատարի ներքին գործերի նախարարությունը հայտարարել է, որ քաղաքացիական պաշտպանության անձնակազմն աշխատանքներ է իրականացնում ոչնչացված հրթիռի բեկորներից արդյունաբերական գոտում բռնկված հրդեհը մարելու ուղղությամբ։ Այս մասին հայտնում է Al Jazeera-ն։
«Տուժածներ չեն գրանցվել», – հայտնել է նախարարությունը։
Ավելի վաղ Կատարի իշխանությունները տագնապ էին հայտարարել՝ զգուշացնելով մարդկանց մնալ իրենց տներում և այլ անվտանգ վայրերում՝ մայրաքաղաք Դոհայում լսվող բարձր պայթյունների պատճառով։
Կատարի պաշտպանության նախարարությունն ավելի ուշ հաստատել էր, որ երկրի հակաօդային պաշտպանության ուժերը հրթիռ են որսացել։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
