Երևան քաղաքի ընդհանուր իրավասության առաջին ատյանի Քրեական Դատարանը (նախագահող՝ ԱՆԻ ԴԱՆԻԵԼՅԱՆ) ՀՀ ԱԳՆ աշխատակից Աշխեն Ալեքսանյանի վարույթով հրապարակեց վերդիկտ, ըստ որի Ալեքսանյանն իրեն մեղսագրվող ՀՀ Քրեկանան Օրենսգրքի 418-րդ հոդվածով, (ազատազրկում՝ 15-20 տարի կամ ցմահ) այլ կերպ ասած՝ պետական դավաճանության մեղադրանքով Ալեքսանյանն արդարացվեց։ Այս մասին ֆեյսբուքյան իր էջում գրել է փաստաբան Աբգար Պողոսյանը։
«Ըստ Դատարանի՝ վերջինիս գործողություններում առկա էր ՀՀ Քր․ Օր.-ի 441-րդ հոդվածի առաջին մասով (Պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը) նախատեսված արարք (առավելագույնը՝ 4 տարի ազատազրկում)։
Թեպետ պաշտպանական կողմը ևս կբողոքարկի դատավճիռը վերաքննիչ քրեական դատարանում, այնուամենայնիվ ցանկանում ենք հատուկ շնորհակալություն հայտնել Դատարանին՝ անկողմնակալ, օբյեկտիվ և անաչառ քննության համար»։
Հիշեցնենք՝ ավելի վաղ տարածվել էր տեղեկություն, որ ԱԱԾ-ն ԱԳՆ-ում հօգուտ Ադրբեջանի գործած պաշտոնյայի է բացահայտել, որը կապի մեջ է եղել ադրբեջանցու հետ եւ նրան փոխանցել կարեւոր տեղեկություններ։ Նշվում էր, որ նա եղել է առանցքային վարչությունների աշխատակից, հասանելիություն է ունեցել կարևոր տեղեկությունների։
Աշխեն Ալեքսանյանը ձերբակալվել էր «Զվարթնոց» օդանավակայանից՝ Վիեննա գործուղման ժամանակ։
