Իրանի մի շարք պետական մարմիններ, այդ թվում՝ Խորհրդարանը, հրատապ կերպով քննարկում են Միջուկային զենքի չտարածման պայմանագրից (ՄԶՉՊ) դուրս գալու հարցը։ «Թասնիմ» գործակալությունը հաղորդում է, որ Իրանում վերջնականապես ամրապնդվում է այն տեսակետը, որ ՄԶՉՊ-ում մնալու համար որևէ հիմնավորում չկա։
«Ըստ ՄԶՉՊ-ի՝ Ատոմային էներգիայի միջազգային գործակալությունը (ԱԷՄԳ) պետք է պայմաններ ապահովի խաղաղ միջուկային տեխնոլոգիաների և դրանց սարքավորումների հասանելիության հարցում Իրանի պաշտպանության և աջակցության համար։ Սակայն, երբ ԱԷՄԳ գլխավոր տնօրեն Ռաֆայել Գրոսին անուղղակիորեն խրախուսում է թշնամուն օգտագործել միջուկային զենք իրանական օբյեկտների դեմ, իսկ ամերիկա-իսրայելական թշնամին հարձակվում է իրանական օբյեկտների վրա՝ առանց ԱԷՄԳ-ի կողմից որևէ խոչընդոտի կամ դատապարտման, ապա Իրանի համար ՄԶՉՊ-ում մնալու այլևս ոչ մի հիմնավորում չի մնում»,- գրում է իրանական գործակալությունը։
Շեշտվում է, որ Միջուկային զենքի չտարածման պայմանագրից դուրս գալը չի նշանակում շարժվել դեպի միջուկային զենք, այլ նպատակ ունի կանխել ԱՄՆ-ի և իսրայելական ռեժիմի կողմից լրտեսության շարունակումը՝ ԱԷՄԳ տեսուչների անվան տակ։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
