armenpress.am Իսրայելի խորհրդարանը հաստատել է 2026 թվականի պետական բյուջեն, հայտարարել է Քնեսեթի խոսնակը։ Այս մասին հաղորդում է Reuters գործակալությունը՝ նշելով, որ բյուջեի չհաստատման դեպքում 90 օրվա ընթացքում, ամենայն հավանականությամբ, արտահերթ ընտրություններ պետք է անցկացվեին։
Երկրում խորհրդարանական ընտրությունները նախատեսված են հոկտեմբերի վերջին, սակայն Իսրայելի վարչապետ Բենիամին Նեթանյահուն հայտարարել է, որ ընտրությունները կարող են անցկացվել սեպտեմբերին։
699 միլիարդ շեկելի (223 միլիարդ ԱՄՆ դոլար) բյուջեում մեծ տեղ է հատկացվում պաշտպանական ծախսերին։ Պաշտպանության նախարարությանը հատկացվող գումարն ավելացել է 20%-ով՝ Իրանի հետ շարունակվող պատերազմի պայմաններում։ Գերատեսչության բյուջեն կկազմի 45 միլիարդ դոլար՝ այլ նախարարությունների բյուջեների կրճատման հաշվին, նշում է The Associated Press-ը։
Գործակալությունը նշում է, որ Իսրայելի ընդդիմությունը քննադատել է բյուջեն, քանի որ դրանով նախատեսվում է նաև ավելացնել ծայրահեղ ուղղափառ համայնքների ֆինանսավորումը՝ չնայած Իրանի դեմ պատերազմի պատճառով աճող գներին։
