news.am ԱՄՆ ռազմաօդային ուժերի ռազմական բեռնատար ինքնաթիռը՝ Boeing C-17 Globemaster III-ը, չորեքշաբթի վայրէջք է կատարել Թբիլիսիի միջազգային օդանավակայանում, ապա կարճ ժամանակ անց կրկին օդ է բարձրացել՝ համաձայն Ազատություն ռադիոկայանի տեղական ծառայության կողմից հրապարակված թռիչքների հետևման տվյալների։ Այս մասին հայտնում է Georgia Today-ը։

Flightradar24-ի տվյալներով՝ ինքնաթիռը Թբիլիսի է ժամանել տեղական ժամանակով մոտավորապես 15:30-ին և մեկնել 16:03-ին՝ հարավային ուղղությամբ։ Հայտնի է, որ այն օդ է բարձրացել Գերմանիայում գտնվող Ռամշտայնում տեղակայված ԱՄՆ ռազմական ավիաբազայից։

Թեև Flightradar24-ում ինքնաթիռի վերջնական ուղղությունը չի նշվել, հետևման տվյալները ցույց են տվել, որ այն արդեն հատել էր Հայաստանի օդային տարածքը և մտել Թուրքիայի տարածք, այնուհետև անհետացել ռադարներից։

Թբիլիսիում ինքնաթիռի կարճ կանգառի պատճառը մնում է անհայտ։