arm.sputniknews.ru Միացյալ Նահանգները պետք է դադարեցնի Իրանի դեմ ռազմական գործողությունները, այլ ոչ թե խոսի Հորմուզի նեղուցի շրջափակման խնդրի մասին: Այս մասին ՌԴ ԱԳ նախարար Սերգեյ Լավրովը հայտարարել է Եգիպտոսի ԱԳ նախարար Բադր Աբդել Աթայի հետ համատեղ մամուլի ասուլիսի ժամանակ։
«Եվ երբ նախագահ Թրամփն ասում է (իմ տեղեկությամբ՝ նախօրեին)՝ «հենց որ մենք ավարտենք ռազմական գործողությունները (իսկ նա հայտարարում է, թե այնտեղ գրեթե բոլոր խնդիրները լուծված են), Հորմուզի նեղուցում անմիջապես կվերսկսվի նորմալ նավագնացությունը…»։ Բայց խնդիրն այն չէ, որ պետք է ուղղակի պահանջել Իրանից, այլ հարկ է դադարեցնել ռազմական գործողությունները, և այդ ժամանակ նեղուցում [նավագնացության] ռեժիմը կվերականգնվի», – ասել է Լավրովը։
Նրա խոսքով՝ պետք է հասնել Պարսից ծոցի շրջանում ռազմական գործողությունների դադարեցմանը և բանակցություններ սկսել։
«Պետք է հասնել ռազմական գործողությունների դադարեցմանը և բանակցությունների մեկնարկին։ Միայն այդպես կարելի է համոզվել, թե որքան անկեղծ են կողմերը ձգտում խաղաղության և իրենց երկրների քաղաքացիների համար լավ ապագայի», – ասել է Լավրովը։
Ինչպես նշել է նախարարը, Բահրեյնի բանաձևի նախագիծը, որն այժմ քննարկվում է ՄԱԿ-ի Անվտանգության խորհրդում, հազիվ թե ավելացնի Իրանի շուրջ ճգնաժամի կարգավորման հնարավորությունները:
Լավրովի կարծիքով՝ Հորմուզի նեղուցի վերաբերյալ ՄԱԿ-ի ԱԽ բանաձևը կարող են օգտագործել բանակցությունները խափանելու կամ Իրանի դեմ ագրեսիան հետին թվով լեգիտիմացնելու համար:
«Վստահաբար դա ծրագրել են՝ ելնելով ամենալավ մտադրություններից, բայց կա՛մ այն օգտագործում են խափանելու բանակցությունների առայժմ շատ փխրուն հնարավորությունները, կա՛մ Իրանի դեմ ագրեսիան հետին թվով լեգիտիմացնելու համար», – ասել է նա:
Ավելի վաղ «Financial Times» թերթը, վկայակոչելով իր աղբյուրները, հայտնել էր, որ ԱՄԷ-ն Բահրեյնի հետ միասին աշխատում է ՄԱԿ-ի Անվտանգության խորհրդի բանաձևի վրա, որը Հորմուզի նեղուցում նավագնացությունը վերականգնելու համար գործողությունների մանդատ կտրամադրի, սակայն թերթի աղբյուրը հայտարարել է, որ Ռուսաստանն ու Չինաստանը կարող են դեմ հանդես գալ այդ քայլին:
