Պաշտոնից ազատվել է Սուրբ Աննա եկեղեցում վարչապետի հետ միջադեպի գործով կալանավորված Դավիթ Մինասյանի գործը քննող քննիչը, հայտնում է «Ազատություն» ռադիոկայանը։
Քննչական կոմիտեն հայտնում է, որ քննիչ Հակոբ Հակոբկոխյանի նկատմամբ սկսվել է ծառայողական քննություն։
«ՀՀ քննչական կոմիտեի Երևան քաղաքի Կենտրոն և Նորք-Մարաշ վարչական շրջանների քննչական երրորդ բաժնի ՀԿԳ քննիչ Հակոբ Հակոբկոխյանի կողմից Քրեական դատավարության օրենսգրքի 35-րդ հոդվածի 4-րդ մասի և 235-րդ հոդվածի 5-րդ մասի պահանջները, այն է՝ խուզարկության կատարման կարգի խախտման, այսինքն՝ այլ անձանց, մասնավորապես՝ ԶԼՄ ներկայացուցիչներին առանց անհրաժեշտության խուզարկության վայր մուտք գործել թույլատրելու, ինչպես նաև Քննչական կոմիտեի ինքնավար պաշտոն զբաղեցնող անձանց վարքագծի կանոնների խախտման, այն է՝ զանգվածային լրատվության միջոցով նախաքննության տվյալների անհարկի հրապարկման, համազգեստ կրելու կանոնների խախտման առթիվ Ներքին անվտանգության վարչությունում սկսվել է ծառայողական քննություն», – նշված է ՔԿ հաղորդագրության մեջ։
ՀՀ Քննչական կոմիտեն նաեւ հայտնում է, որ Հակոբ Հակոբկոխյանը հրավիրվել է Ներքին անվտանգության վարչություն բացատրություն տալու համար, որից հետո դիմում է ներկայացրել զբաղեցրած պաշտոնից ազատվելու մասին։
