armenpress.am Ամերիկյան «Օրիոն» տիեզերանավը, որը «Արտեմիս 2» առաքելության շրջանակում չորս աստրոնավտի տեղափոխեց ավելի հեռու, քան երբևէ եղել էին մարդիկ, ավարտել է Լուսնի շուրջ իր անցումը և այժմ վերադառնում է Երկիր։Այս մասին հայտարարել է ՆԱՍԱ-ն։
«Այն գտնվում է իր թռիչքի վերջին փուլում՝ վերադառնալով Երկիր», – ասվում է հայտարարության մեջ։
Երկուշաբթի օրը սկսված և գրեթե յոթ ժամ շարունակված անցման ընթացքում տիեզերանավը գիտական հետազոտություններ է անցկացրել և լուսանկարել է Լուսնի մակերևույթի երեք տասնյակից ավելի օբյեկտներ։
Ամենասերտ մոտեցման պահին տիեզերանավը գտնվում էր Լուսնի մակերևույթից 6550 կմ հեռավորության վրա։
Անձնակազմը կարողացել է դիտարկել Լուսնի՝ Արևի լույսով լուսավորված մակերևույթը մոտ հինգ ժամ։ Առաջին անգամ տիեզերագնացները ուսումնասիրել են դրա հակառակ կողմը՝ նախորդ ամերիկյան «Ապոլոն» առաքելությունների համեմատ ավելի բարձր և ավելի լայն դիտակետից։
Տիեզերագնացներն ականատես են եղել, թե ինչպես են երկնաքարեր ընկնում Լուսնի մակերևույթին և դիտարկել խավարումը եզակի դիտակետից, երբ Արևը անհետացել է Լուսնի ետևում։ Թռիչքի ընթացքում փաստաթղթավորվել են բոլոր օբյեկտները, ներառյալ չափը, ձևը և նույնիսկ խառնարանների, լանջերի և կառույցների գույնը։
ՆԱՍԱ-ի տվյալներով՝ «Օրիոն» տիեզերանավը, որի անձնակազմի մեջ են մտնում ՆԱՍԱ-ի տիեզերագնացներ Ռեյդ Ուայզմանը, Վիկտոր Գլովերը և Քրիստինա Կոխը, ինչպես նաև Կանադայի տիեզերական գործակալության (CSA) տիեզերագնաց Ջերեմի Հանսենը, ապրիլի 10-ին կվերադառնա Երկիր՝ վայրէջք կատարելով Խաղաղ օվկիանոսում։
Նրանց հաջող թռիչքի կապակցությամբ շնորհավորել է ԱՄՆ նախագահ Դոնալդ Թրամփը։ «Այսօր դուք պատմություն կերտեցիք և ստիպեցիք ամբողջ Ամերիկային իսկապես հպարտանալ ձեզնով, աներևակայելիորեն հպարտանալ։ Վերջերս մենք շատ պատճառներ ունենք հպարտանալու, սակայն չկա ոչինչ, որը կհամեմատվեր նրա հետ, ինչ դուք եք անում՝ ավելի քան կես դար հետո առաջին անգամ պտտվելով Լուսնի շուրջ և գերազանցելով Երկրից առավելագույն հեռավորության վրա գտնվելու բոլոր ժամանակների ռեկորդը», – ասել է նախագահը «Օրիոնի» անձնակազմի հետ կապի ժամանակ։ Նա հրավիրել է աստրոնավտներին Երկիր վերադառնալուց հետո այցելել Սպիտակ տուն։
«Օրիոն» տիեզերանավը արձակվել էր ծանր SLS հրթիռով Ֆլորիդայի Քեյփ Քանավերալ ռազմաօդային կայանից ապրիլի 1-ին:
