ԱՄՆ նախագահ Դոնալդ Թրամփը Իրանի համար Հորմուզի նեղուցը բացելու վերջնաժամկետ է նշում Երևանի ժամանակով գիշերը ժամը 04։00-ն։
Պակիստանի վարչապետը խնդրել է Թրամփին երկարաձգել վերջնաժամկետը 2 շաբաթով, իսկ Իրանին՝ բացել Հորմուզի նեղուցը նույն ընթացքում։
Axios-ը՝ հղում անելով Սպիտակ տան մամուլի քարտուղար Կարոլին Լևիթին, հայտնում է՝ Թրամփը «տեղյակ է Պակիստանի վարչապետի առաջարկի մասին, արձագանք կլինի»։
Իրանն էլ դրականորեն դիտարկում է Պակիստանի՝ երկշաբաթյա հրադադարի վերաբերյալ խնդրանքը։ Այդ մասին Reuters-ին հայտնել է Իրանի անանուն բարձրաստիճան պաշտոնյան։
Ավելի վաղ Թրամփը սպառնացել է՝ «մի ամբողջ քաղաքակրթություն կմահանա այս գիշեր՝ պայմանով, որ երբեք հետ չի բերվի»: Այս հայտարարությունից հետո, իրանական հեռուստատեսության փոխանցմամբ, Իրանը սառեցրել է բոլոր դիվանագիտական ուղիները և անուղղակի բանակցությունները ԱՄՆ-ի հետ:
Ֆրանսիայի ԱԳ նախարար Ժան-Նոել Բարոն հույս է հայտնել, որ ԱՄՆ նախագահը չի իրագործի Իրանի դեմ ուղղված իր սպառնալիքը, և որ Ֆրանսիան դեմ է քաղաքացիական ենթակառուցվածքների վրա հարձակումներին։
ՄԱԿ գլխավոր քարտուղար Անտոնիու Գուտերիշը խորապես մտահոգված է հայտարարություններով և ընդգծել է, որ ոչ մի ռազմական նպատակ չի արդարացնում «խաղաղ բնակիչներին միտումնավոր տառապանք պատճառելը» կամ ենթակառուցվածքների կործանումը:
Հռոմի Լևոն XIV պապը քննադատել է Դոնալդ Թրամփին․ «Այսօր, ինչպես բոլորս գիտենք, հնչեց այս սպառնալիքը Իրանի ողջ ժողովրդի դեմ։ Սա իսկապես անընդունելի է։
Նշելով, որ հարձակումները խաղաղ բնակիչների և քաղաքացիական օբյեկտների վրա արգելված են՝ Amnesty International-ի ղեկավար Ագնես Քալամարդը նշել է, որ ԱՄՆ նախագահի՝ «բնաջնջման և անդառնալի կործանման սպառնալիքը լկտիաբար ոտնահարում է միջազգային մարդասիրական իրավունքի հիմնական կանոնները՝ պոտենցյալ աղետալի հետևանքներ ունենալով ավելի քան 90 միլիոն մարդու համար»։
