Իրանի նախագահ Մասուդ Փեզեշքիանը հայտարարել է, որ ԱՄՆ նախագահ Դոնալդ Թրամփը չի կարող Իրանին զրկել միջուկային իրավունքներից: Այս մասին հայտնում է իրանական IRNA լրատվական գործակալությունը։
«Ո՞վ է ԱՄՆ նախագահը համաշխարհային մասշտաբով, որ զրկի մի ազգի իր օրինական իրավունքներից»,- մասնավորապես, նշել է Իրանի նախագահը: Նա ընդգծել է, որ յուրաքանչյուր մարդ, անկախ կրոնից կամ ռասայից, պետք է հասանելիություն ունենա իր անօտարելի իրավունքներին, և կոչ է արել արդարություն հաստատել միջազգային հարաբերություններում:
Փեզեշքիանը քննադատել է ՄԱԿ-ին և իրավապաշտպան կազմակերպություններին տարածաշրջանում Իսրայելի և ԱՄՆ-ի գործողությունները չքննադատելու համար: Նրա խոսքով՝ այդ կառույցները «քնած են» կամ սահմանափակվում են ձևական մտահոգությամբ այն ընթացքում, երբ զոհվում են խաղաղ բնակիչներ և երեխաներ:
Հիշեցնենք, որ նախորդ շաբաթ Պակիստանում Իրանի և ԱՄՆ-ի միջև տեղի ունեցած բանակցությունների ընթացքում տարաձայնությունների ամենակարևոր կետերից մեկը Իրանի միջուկային ծրագիրն էր։
«Մեզ անհրաժեշտ է տեսնել հաստատակամ հանձնառություն առ այն, որ [Իրանը] չի ձգտի տիրանալ միջուկային զենքի և չի ձգտի ձեռք բերել այնպիսի գործիքներ, որոնք թույլ կտան նրանց արագորեն ստեղծել այն»,- ասել էր ամերիկյան պատվիրակության ղեակավար, ԱՄՆ փոխնախագահ Ջեյ Դի Վենսը։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
