Այսօր Պետական եկամուտների կոմիտեում կայացել է Հայաստանի Հանրապետության և Եվրոպական Միության միջև կնքված Համապարփակ և ընդլայնված գործընկերության համաձայնագրի ներքո գործող մաքսային հարցերով ենթակոմիտեի վեցերորդ նիստը։ Այդ մասին իր ֆեյսբուքյան էջում գրել է ՊԵԿ նախագահ Էդուարդ Հակոբյանը։
«ԵՄ գործընկերների հետ շարունակական համագործակցության շնորհիվ հաստատվել է կառուցողական և արդյունքահեն երկխոսություն, որը շարունակում է կարևոր դեր խաղալ Հայաստանի մաքսային համակարգի զարգացման գործում՝ միջազգային և եվրոպական չափանիշներին համապատասխան։
Քննարկել ենք ԵՄ աջակցությամբ իրականացվող սահմանային անցակետերի և ենթակառուցվածքների արդիականացման ընթացիկ ծրագրերը, նախանշել համագործակցության նոր հեռանկարներ։
Հանդիպմանն անդրադարձել ենք նաև Հայաստանի, մասնավորապես, CUSTOMS և FISCALIS ծրագրերին միանալու նախաձեռնության առաջիկա գործնական քայլերին, նախանշել ենք դրանց իրագործման ժամկետները»,- նշված է գրառման մեջ։
