armenpress.am Ֆրանսիան կոչ է անում Մերձավոր Արևելքում հակամարտության կողմերին դադարեցնել ռազմական գործողությունները, նստել բանակցությունների սեղանի շուրջ՝ հարգելով տարածաշրջանի երկրների շահերը: ՀՀ վարչապետ Նիկոլ Փաշինյանի հետ հանդիպումից հետո կայացած մամուլի ասուլիսի ժամանակ այս մասին հայտարարել է Ֆրանսիայի նախագահ Էմանուել Մակրոնը՝ պատասխանելով ֆրանսիացի լրագրողի հարցին:
«Ես խոսելու եմ Իրանի նախագահի հետ: Սակայն Ֆրանսիան ի սկզբանե ունի նույն դիրքորոշումը: Մենք կոչ ենք անում դադարեցնել բոլոր ռազմական գործողությունները, սկսել դիվանագիտական բանակցություններ՝ հարգելով տարածաշրջանի բոլոր երկրների շահերը: Այո, Հորմուզի նեղուցը պետք է բացվի բոլոր նավերի համար՝ առանց որևիցե վճարումների և հարկադիր միջոցների: Ցանկացած էսկալացիա, ընդհանրապես բոլոր երկրների և նավերի դեմ, սխալ է, այն բերում է լարվածության էլ ավելի աճի», – ասել է Ֆրանսիայի նախագահը:
Անդրադառնալով ԵՄ նկատմամբ մաքսային վճարումների ավելացման մասին ԱՄՆ նախագահ Դոնալդ Թրամփի հայտարարությունների վերաբերյալ հարցին՝ Մակրոնն ասել է.
«Մենք ցանկանում ենք, որ լինի արդար ու ազատ առևտուր՝ ըստ կանոնակարգերի ու համաձայնագրերի: Պետք է հարգել ստորագրված համաձայնագրերը: Եթե դրանք կասկածի տակ են դրվում, կամ եթե որևիցե երկիր պետք է սպառնալիքներ հնչեցնի, այդ դեպքում ԵՄ-ն պետք է միջամտի: Այո, ամեն ինչ սեղանին է, և ես կարծում եմ, որ այս աշխարհաքաղաքական ժամանակահատվածում դաշնակիցները, ինչպիսիք են ԱՄՆ-ն և ԵՄ-ն, այլ անելիքներ ունեն, քան իրավիճակը ապակայունացնել փորձելը: Մեր ընկերությունները, մեր ընտանիքները, մեր հասարակությունները կայունության, վստահության ուղերձի կարիք ունեն: Ամեն ինչ սեղանին է, բայց հուսանք, որ խելամտությունը նորից կվերադառնա, որպեսզի ամեն ինչ լինի ներդաշնակ»։
