Ալեն Սիմոնյանը չի մեկնաբանում Բելառուսի ԱԳՆ հայտարարությունը, միայն նշում է, որ ինքը տեղյակ չէ՝ իր հայտարարությունն է պատճառը, թե ոչ:
Հարցին, թե չի՞ կարծում, որ իր հայտարարությունը ավելի է վատթարացնում հարաբերությունները Բելառուսի հետ, Սիմոնյանը պատասխանել է. «Ես կարծում եմ, որ Հայաստանի նկատմամբ, ՀԱՊԿ-ում գոևրծընկերոջ նկատմամբ, Հայաստանի պետականության նկատմամբ անհարգալից վերաբերմունքն է վատացնում հարաբերությունները, Ադրբեջանի հետ 44-օրյա պատերազմ նախապատրաստելն է վատացնում հարաբերությունները»:
Նրա խոսքով՝ քաղաքական կուրսը պետության ընտրության հարց է, Հայաստանի համար մարդու իրավունքները, ազատությունները կարևորագույն արժեքներ են. «Ամեն պետություն իր օրինակն է ընտրում, մենք ընտրել ենք Հայաստանի ժողովրդավարացման ճանապարհը, իրենք այլ ճանապարհ են ընտրել»:
Սիմոնյանն ընդգծել է, որ Հայաստանը ծայրագավառ չի լինելու, քաղաքական կախվածության մեջ չի լինելու, բարձրացնելու է իր ինքնիշխանության մակարդակը քաղաքական և մնացած բոլոր առումներով. «Բելառուսի կառավարման օրինակը իմ երկրի համար, ինձ համար անընդունելի է: Հայաստանը ազատ երկիր է՝ իր ազատ մեդիայով, մարդու իրավունքներով և օրենքի գերակայությամբ»:
Հիշեցնենք՝ Բելառուսի ԱԳՆ-ն հայտնել է, որ «Բելառուսում Հայաստանի գործերի ժամանակավոր հավատարմատարին ներկայացվել է խիստ բողոք և հանձնվել է նոտա՝ կապված հայկական կողմի վերջին ոչ բարեկամական գործողությունների հետ»։
Ըստ ԶԼՄ-ների՝ բելառուսական կողմի դժգոհության պատճառ են դարձել ԱԺ նախագահ Ալեն Սիմոնյանի վերջին հայտարարությունները, որտեղ նա նշել էր, որ Հայաստանը չպետք է դառնա գուբերնիա և չպետք է կառավարվի այնպես, ինչպես Բելառուսը:
