Մայիսի 6-ին «Երեւանյան երկխոսություն» 2026 միջազգային համաժողովի շրջանակում ԱԺ արտաքին հարաբերությունների մշտական հանձնաժողովի հետ համագործակցությամբ կազմակերպվել է «Խորհրդարանները մասնատվող աշխարհում. ժողովրդավարության պաշտպանությունը եւ աշխարհաքաղաքական փոփոխություններին կողմնորոշվելը» խորագրով պանելային քննարկմումը: Այս մասին հայտնում են ԱԺ-ից։
«Միջոցառմանը մասնակցել են Հայաստանի, Միացյալ Թագավորության, Ուկրաինայի, Խորվաթիայի, Ռումինիայի խորհրդարանների ներկայացուցիչները:
Պանելային քննարկումը համակարգել է «Հանուն հավասար իրավունքների» կրթական կենտրոն ՀԿ նախագահ Գայանե Աբրահամյանը:
ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը, ողջունելով քննարկման մասնակիցներին, խոսել է Հայաստանում ժողովրդավարության ամրապնդման կարեւորության մասին: ԱԺ պատգամավորն այդ հարցում ընդգծել է ԵՄ անդամ երկրների աջակցությունը: Զեկուցողն անդրադարձել է հետպատերազմյան շրջանում մեր երկրում ժողովրդավարական արժեքների պաշտպանության դժվարություններին:
Մասնակիցներն անդրադարձել են կոնֆլիկտային ու ճգնաժամային իրավիճակներում խորհրդարանների դերին: Այս համատեքստում կարեւորվել են միջխորհրդարանական դիվանագիտության գործիքի կիրառումն ու միջազգային տարբեր հարթակներում օրենսդիր մարմինների ներկայացուցիչների սերտ փոխգործակցությունը:
Ժողովրդավարության պաշտպանության, ամրապնդման ու դիմադրողականության բարձրացման հարցում բանախոսները ներկայացրել են իրենց երկրների փորձն ու իրականացված քայլերը:
Մասնակիցները նաեւ խոսել են հիբրիդային սպառնալիքներին դիմակայման կարեւորության մասին՝ նշելով, որ դրա դեմ ուղղված պայքարը հնարավոր է միջազգային երկխոսության ու փորձի փոխանակման միջոցով:
Քննարկմանն անդրադարձ է կատարվել ՀՀ-ԵՄ հարաբերություններին ու ընդլայնվող գործակցությանը: Հյուրերը ողջունել են Հայաստանի եվրոպական ձգտումները»,- նշված է հաղորդագրությունում։
