Երևանի նախկին «Հայրենիք» կինոթատրոնի շենքին փակցված՝ օրենքով թույլատրելի չափը գերազանցող նախընտրական պաստառի շուրջ ծագած միջադեպի գործով երեք անձ ձերբակալվել է, այս մասին հայտնում է ՆԳՆ ոստիկանությունը։
«Երևանի Գարեգին Նժդեհի փողոցում գտնվող նախկին «Հայրենիք» կինոթատրոնի շենքի պատին՝ 9 քմ չափով փակցված է եղել կուսակցություններից մեկի գովազդային պաստառը, ինչը չի համապատասխանել գովազդի մասին օրենքի չափանիշներին։
Մայիսի 7-ին՝ ժամը 15:00-ի սահմաններում, Երևանի քաղաքապետարանի Շենգավիթ վարչական շրջանի աշխատակազմի առևտրի ծառայության և գովազդի բաժնի մասնագետները փորձել են ապամոնտաժել պաստառը, ինչի ընթացքում շենքի սեփականատերը երկու անձանց հետ կոպիտ կերպով խախտելով հասարակական կարգը, հնչեցրել են հայհոյանքներ, հարվածներ հասցրել վարչական շրջանի աշխատակիցներին՝ պատճառելով մարմնական վնասվածքներ։
Համայնքային ոստիկանության Շենգավիթի բաժնի ծառայողների անհետաձգելի ձեռնարկած օպերատիվ միջոցառումների շնորհիվ 67 և 50-ամյա տղամարդիկ հայտնաբերվել և ձերբակալվել են, իսկ 29-ամյա երիտասարդը ինքնակամ ներկայացել է բացատրական աշխատանքի արդյունքում»,- ասված է հաղորդագրությունում։
Ավելի վաղ հայտնել էինք, որ մայիսի 7-ին, միջադեպ է տեղի ունեցել Շենգավիթ վարչական շրջանի ղեկավարի աշխատակազմի աշխատակիցների և ԲՀԿ առաջնորդ Գագիկ Ծառուկյանի թիմակիցների միջև։
Թաղապետարանի աշխատակիցները ցանկացել են Բագրատունյաց պողոտայում գտնվող ԲՀԿ շտաբի վրայից հեռացնել Ծառուկյանի և ԲՀԿ ցուցակի թեկնածու Գևորգ Ստեփանյանի քարոզչական պաստառը՝ թույլատրելի 5 քմ ծավալը գերազանցելու պատճառաբանությամբ։ Արդյունքում առաջացել էր վիճաբանություն, մեկ անձ տեղափոխվել էր հիվանդանոց։
