news.am Լեռնային Ղարաբաղի հայերը՝ մեր հայրենակիցները, մշտապես գտնվել են Հայաստանի քաղաքացիների ուշադրության և հոգածության կենտրոնում, նրանց մասին հոգ են տարել ինչպես երկրի սովորական քաղաքացիները, այնպես էլ պետական մարմինները, և թող ոչ ոք չփորձի սեպ խրել Արցախի և Հայաստանի հայերի միջև։ Այս մասին մայիսի 18-ին Երևանի Արաբկիր վարչական շրջանում նախընտրական քարոզարշավի ընթացքում հայտարարել է Հայաստանի առողջապահության նախարար Անահիտ Ավանեսյանը։
Նրա գնահատմամբ՝ արձակուրդում գտնվող ՀՀ վարչապետ Նիկոլ Փաշինյանի այսօրվա հայտարարությունները բավականին սուր են եղել, սակայն դրանք համապատասխանում են այն «կիսաահաբեկչական դրսևորումներին», որոնց մասին հայտարարել էր Փաշինյանը։ Նա հավելել է, որ Հայաստանում 1999 թվականի հոկտեմբերի 27-ի և 2008 թվականի մարտի 1-ի իրադարձություններից հետո ահաբեկչության դարաշրջանը փակվել է, և որևէ մեկը չպետք է խաղա մարդկանց զգացմունքների հետ ու փորձի «ահաբեկչությունը» վերադարձնել Հայաստան։
Ավանեսյանի խոսքով՝ իշխանության ձգտող «ղարաբաղյան կլանը» երկիրը ստրկացնում ու շարունակում է կողոպտել այն՝ առաջ մղելով սեփական շահերը և օգտագործելով թե՛ Արցախի, թե՛ Հայաստանի հայերին։ «Այսօր պատերազմի եռագլուխ կուսակցությունը փորձում է Հայաստանը ներքաշել պատերազմի տրամաբանության մեջ, և մենք այս ամբողջ հռետորաբանությանը հստակ պատասխան ենք տալիս. Հայաստանում հակամարտությունների դարաշրջանն ավարտվել է, իսկ Հայաստանը խաղաղության կողմնակից է»,- ընդգծել է նա՝ հավելելով, որ բացասաբար է վերաբերվում բռնության կոչերին։ Ավանեսյանը նաև նշել է, որ Փաշինյանն արդեն երկար ժամանակ է, ինչ ուղիղ բանավեճ է առաջարկում բոլոր նրանց, ովքեր երբևէ պատասխանատվություն են կրել Հայաստանի համար։
«Ինչո՞ւ չեն գնում դեբատների»,- նշել է նա։
Անահիտ Ավանեսյանը վատ բան չի տեսել «քեռակին» բառի մեջ, որով իշխանության կողմնակիցներն անվանել են այն կնոջը, ով այսօր բանավեճի մեջ է մտել Փաշինյանի հետ, և ով, իշխող կուսակցության համակիրների խոսքով, ուղարկված է եղել ընդդիմության կողմից։ «Այո, կան քաղաքացիներ, որոնք քարոզարշավի ժամանակ մեզ սուր քննադատում են։ Եթե կինը եկել է իր հարցը տալու, ապա ինքը պետք է նաև պատասխանը լսի, բայց նա չէր ուզում»,- եզրափակել է Ավանեսյանը։
Հիշեցնենք, որ այսօր Երևանի Արաբկիր վարչական շրջանում ՔՊ քարոզարշավի ժամանակ միջադեպ տեղի ունեցած Նիկոլ Փաշինյանի և մի կնոջ միջև։ Զրույցի ընթացքում Նիկոլ Փաշինյանը հունից դուրս եկավ և ասաց. «Եթե դուք Ռոբն եք, ձեզ կզացնելու ենք. Ռոբին էլ եմ կզացնելու, կալուգացուն էլ եմ կզացնելու, Գագոյին էլ եմ կզացնելու, Սերժին էլ եմ կզացնելու [․․․] Ղարաբաղի ակցենտով մասկավորվածները, որ բան են տարածում, դուք փախած լակոտներ եք, հանեք ձեր մասկեքը, այ ստահակներ, այ փախածներ, դուք վախկոտ համբալներ եք, որ փախել եք մարտադաշտից: Հանեք ձեր մասկեքը Ռոբի լակոտներ, Սերժի լակոտներ, Գագոյի լակոտներ, կալուգա… Չոքցնելու եմ սաղիդ, հատ-հատ մասկեքներդ կոխելու եմ համապատասխան տեղը»։
