ՀՀ վարչապետ Նիկոլ Փաշինյանը Լոռու մարզում «Քաղաքացիական պայմանագիր» կուսակցության քարոզարշավի ժամանակ հայտարարել է, որ ԲՀԿ առաջնորդ «Գագիկ Ծառուկյանի բիզնես ողնաշարը»՝ Արարատի ցեմենտի գործարանը, լինելու է պետական, և այն պատկանելու է Հայաստանի Հանրապետությանը:
«Գուլոյան-Ծառուկյան (Աբովյանի նախկին համայնքապետ Կարապետ Գուլոյան, ԲՀԿ առաջնորդ Գագիկ Ծառուկյան՝ խմբ.) մաֆիայի մախինացիան բացահայտվել է, և ՀՀ կառավարությունը գրություն է ստացել ՀՀ դատախազությունից, որ գույքը ենթակա է պետականացման»,- ասել է Փաշինյանը:
Նա ընդգծել է, որ առաջիկայում շատ արագ ինչպես ՀԷՑ-ում նշանակել են կառավարիչ, այնպես էլ Արարատի ցեմենտում են նշանակելու կառավարիչ:
«Գործարանի աշխատակիցներին շնորհավորում եմ ազատագրման առիթով: Էս պահից նրանք Ծառուկյանի, Գուլոյանի որևէ հրահանգ կատարելու կարիք չունեն, որովհետև նրանց գործատուն այլևս ՀՀ կառավարությունն է: Արարատ ցեմենտը շուտով դե յուրե վերադարձվելու է ՀՀ-ին»,- եզրափակել է Փաշինյանը:
