«Ուժեղ Հայաստան» դաշինքը Կառավարություն կազմելու դեպքում հենց առաջին նիստին ընդունելու է «Սաֆարովի կանխարգելման» օրինագիծ:
Այս մասին հրավիրված ասուլիսի ժամանակ հայտարարել է դաշինքի ղեկավար և վարչապետի թեկնածու Սամվել Կարապետյանը:
«Եթե մենք չկարողանանք կանգնեցնել Փաշինյանի և Ալիևի պլանավորած 300 000 ադրբեջանցու մուտքը ՀՀ, կստացվի, որ մեր բոլոր տնտեսական ծրագրերն անիրագործելի են լինելու, քանի որ հիմնական աշխատատեղերը բաժին են հասնելու ադրբեջանցիներին:
Դրա համար մենք մեր Կառավարության հենց առաջին նիստին ընդունելու ենք գլխավոր օրենքը մեր երկրի համար, դա մենք կոչել ենք «Սաֆարովի կանխարգելման» օրենք, որպեսզի արգելենք ադրբեջանցիներին գնել մեր հողերը, գնել մեր տները, նվեր ստանալ մեր հողերը, ինչպես բոլորս տեսել ենք»,- նշել է նա:
Դաշինքի անդամ Արամ Վարդևանյանը մանրամասնել է, որ այն կոչվելու է «Սաֆարովի կանխարգելման» օրինագիծ կամ «ատելության կանխարգելման» օրենսդրական փաթեթ, որով առաջարկելու են, որ Ադրբեջանի քաղաքացիություն ունեցող ոչ մի ֆիզիկական կամ իրավաբանական անձ չկարողանա ձեռք բերել որևէ անշարժ գույք ՀՀ-ում:
Հիշեցնենք, որ ՀՀ վարչապետ, ՔՊ կուսակցության վարչապետի թեկնածու Նիկոլ Փաշինյանը, ի պատասխան իրենց իշխանության օրոք 300 000 ադրբեջանցիների՝ Հայաստանում բնակվելու մասին հարցին, հայտարարել էր, որ դա սուտ է:
Չնայած Նիկոլ Փաշինյանը բազմիցս է հայտարարել է, որ հայ-ադրբեջանական բանակցային օրակարգում ադրբեջանցիների վերադարձի հարց չի քննարկվում, Ադրբեջանը շարունակում է այդ խոսույթը առաջ մղել։
Նշենք, որ մինչև 1939 թվականը Խորհրդային Միության տարածքում, այդ թվում՝ Հայաստանի, թյուրքախոսների համար «ադրբեջանցի» եզրույթը պաշտոնապես փաստագրված չէր։
Այս ժողովրդի համար «ադրբեջանցի» եզրույթը՝ որպես էթնանվանում, առաջին անգամ օգտագործվել է միայն 1939 թվականին՝ ԽՍՀՄ համընդհանուր մարդահամարի ժամանակ։ 1939-ի մարդահամարի տվյալներով՝ Հայկական ԽՍՀ-ում ադրբեջանցիների թիվը կազմում էր 130 հազար, իսկ 1979-ի մարդահամարի տվյալներով՝ 160 հազար։ Այսինքն՝ Հայկական ԽՍՀ-ում երբեւէ 300 հազար «ադրբեջանցի» չի բնակվել։ Եվ ավելին՝ մարդահամարի ժամանակ մուսուլման այլազգիներին եւս գրանցում էին որպես ադրբեջանցի։
