armenpress.am «Միասնության թևեր» կուսակցության նախընտրական քարոզարշավի 26-րդ օրն անցել է Գեղարքունիքի մարզի Մարտունի քաղաքում։ Կուսակցության նախընտրական ցուցակի առաջին համար Արման Թաթոյանը ընտրողների հետ հանդիպման ժամանակ կոչ է արել գնալ ընտրատեղամասեր և քվեարկել հանուն երկրի ապագայի։ «Քվեախցիկում ամեն ինչ գաղտնի է, և ոչ ոք չի կարողանալու ձեզ ճնշել կամ իմանալ, թե ում օգտին եք քվեարկել։ Դուք մտածեք, թե ով կարող է ձեր երեխաների համար ճիշտ որոշումներ կայացնել ապագայում` մեր պետականության համար կարևոր այս պատմական ընտրություններում»,-նշել է նա։
Թաթոյանը տեղեկացրել է, որ Մարտունին իր համար փոքրիկ հայրենիք է, քանի որ մանկությունն այնտեղ է անցել, և ինքը շատ լավ գիտի տեղի խնդիրները։ «Ես պարտավորվում եմ հատկապես առանձին խնդիրներին հատիկ-հատիկ անդրադառնալ»,-նշել է Թաթոյանը՝ հավելելով, որ հրաշքներ խոսք չի տալիս, բայց ազնիվ ու արդար աշխատանք է խոստանում։ «Ինձ համար կարևոր արժեք է, որ դուք երբեք չամաչեք ինձ ձայն տալու համար։ Ես պատկերացնում եմ, թե ինչպես պետք է մարդկանց խնդիրները լուծել։ Հայաստանում չկա որևէ հարց, որ հայերով չկարողանանք լուծել»,-հավելել է Արման Թաթոյանը։
«Միասնության թևեր» կուսակցության ներկայացուցիչները Մարտունիում քարոզարշավի ընթացքում քայլել են փողոցներով, քարոզչական թռուցիկներ բաժանել քաղաքացիներին՝ պատասխանելով նրանց հուզող հարցերին։
