Երեկ՝ հունիսի 2-ին, Մասիսում տեղի ունեցած միջադեպի վերաբերյալ ստացվել է 2 հաղորդում: Այս մասին հայտնում է Քննչական կոմիտեի խոսնակ Կիմա Ավդալյանը:
Ավելի վաղ հայտնել էինք, որ Մասիսում հարձակվել են «Ուժեղ Հայաստան» կուսակցության թիմակիցների վրա։ Սայիդա Պողոսյանի ֆեյսբուքյան էջում հրապարակված տեսանյութից երեւում է, որ մի քանի անձ հարձակվում է «Ուժեղ Հայաստանի» շապիկներով մարդկանց վրա ու հարվածում, քաշքշում նրանց։ Ըստ հրապարակված կադրերի՝ մի տղամարդ հարվածում է նաեւ կանանց։
Քննչական կոմիտեի խոսնակ Կիմա Ավդալյանի փոխանցմամբ՝ քրեական վարույթը նախաձեռնվել է մի խումբ անձանց կողմից ֆիզիկական ներգործության (195-րդ հոդվածի 2-րդ մասի 5-րդ կետ), խուլիգանության (297-րդ հոդվածի 2-րդ մասի 1-ին կետ), քարոզչություն կատարելուն խոչընդոտելու (211-րդ հոդվածի 2-րդ մասի 5-րդ կետ) հատկանիշներով:
