arm.sputniknews.ru Մեծ Բրիտանիայի Բելֆաստ քաղաքում հունիսի 9-ի երեկոյան հակամիգրացիոն բողոքի ցույցեր են սկսվել տեղի բնակչի վրա միգրանտի կողմից դանակով հարձակման դեպքից հետո։ Այս մասին հայտնում են բրիտանական լրատվամիջոցները։ Զանգվածային ակցիաների առիթ է եղել սոցիալական ցանցերում տարածված հարձակման տեսագրությունը, որտեղ կասկածյալը դանակով հարվածներ է հասցնում տուժողին։
Ոստիկանության տվյալներով՝ կասկածյալը Սուդանից ժամանած 30-ամյա փախստական է։ Նրան սպանության փորձի մեղադրանք է առաջադրվել։ Տուժածը ծանր վիճակում տեղափոխվել է հիվանդանոց։ Իրավապահ մարմիններն ընդգծել են, որ տեղի ունեցածը չի դիտարկվում որպես ահաբեկչական ակտ։
Զանգվածային ցույցեր անցկացնելու կոչը տարածել է աջակողմյան ակտիվիստ Թոմի Ռոբինսոնը։ Բելֆաստի փողոցներ են դուրս եկել հարյուրավոր ցուցարարներ։ Անկարգությունների ընթացքում հրկիզել են երթուղային ավտոբուս, ավտոմեքենաներ և աղբամաններ։ Բացի այդ, ակցիայի մասնակիցները փակել են քաղաքի գլխավոր մայրուղիներից մեկը, ինչը հանգեցրել է լուրջ խցանումների։ Հաղորդվում է նաև հասարակական տրանսպորտի աշխատանքի խափանումների մասին։
Հյուսիսային Իռլանդիայի ոստիկանության փոխնախագահ Ռայան Հենդերսոնը բնակիչներին հանդարտության կոչ է արել և դիմել է տեղական համայնքների առաջնորդներին՝ խնդրելով աջակցել բացառապես բողոքի խաղաղ ձևերին և թույլ չտալ բռնության տարածում։
Մեծ Բրիտանիայի վարչապետ Կիր Սթարմերը հարձակումն անվանել է «սարսափելի»։ Հյուսիսային Իռլանդիայի հինգ խոշորագույն քաղաքական կուսակցությունների առաջնորդներն իրենց հերթին կոչ են արել դադարեցնել անկարգությունները և իրավապահ մարմիններին հետաքննություն անցկացնելու հնարավորություն տալ։ Իշխանությունները հաստատել են, որ կասկածյալը Մեծ Բրիտանիայի տարածքում օրինական հիմունքներով գտնվում է 2023 թվականից։
