Հայաստանը երկու տարուց ավելի է՝ պարտք ունի ՀԱՊԿ բյուջեի նկատմամբ, այսօր մենք համաձայնել ենք քննարկել ՀԱՊԿ կանոնադրության համապատասխան հոդվածը կիրառելու հարցը։ Այս մասին հայտարարել է ՌԴ ԱԳ նախարար Սերգեյ Լավրովը։
«Հունիսի 7-ին, երբ իմ գործընկեր Արարատ Միրզոյանին հարցրել են ՀԱՊԿ-ի մասին, ասել է. «Մենք անդամավճար չենք վճարում, քանի որ պարզապես չենք մասնակցում»։ Ի՞նչ պետք է անենք այս իրավիճակում։ Մենք այսօր խոսեցինք այս մասին և համաձայնեցինք քննարկել», – նշել է Լավրովը։
ՀԱՊԿ կանոնադրության այդ հոդվածը կարգավորում է անդամ երկրների նկատմամբ գործողությունները, որոնք չեն կատարում իրենց պարտավորությունները։
Լավրովը նշել է, որ Հայաստանը, ՀԱՊԿ միջոցառումներին չմասնակցելով հանդերձ, ակտիվորեն ընդլայնում է համագործակցությունը ՆԱՏՕ-ի անդամ երկրների հետ։
«Նրանք զորավարժություններ են անցկացնում, գնում են ռազմական տեխնիկա, փոխանակում ռազմական պատվիրակություններ ինչպես ՆԱՏՕ-ի, այնպես էլ Եվրամիության հետ, որը նույնպես ներկայումս վերածվում է ռազմականացված կառույցի», – «TASS»-ի փոխանցմամբ ասել է ՌԴ ԱԳ նախարարը։
