civilnet.am Բոլոր կաշառակեր դատավորները բռնվելու և դատվելու են։ Հունիսի 11-ին կառավարությունում նման սպառնալիք հնչեցրեց վարչապետ Նիկոլ Փաշինյանը։
«Անունները կհրապարակվեն ըստ քրեական գործերի, եթե լինեն այդպիսի քրեական գործեր»,- ասաց վարչապետը։
Անդրադառնալով խորհրդարանական ընտրություններից առաջ ընդիմադիր ուժերի կողմից ենթադրյալ ընտրակաշառ բաժանելու դեպքերին, Փաշինյանն ասաց, որ այս ընտրություններին ընտրակաշառքի համար «բռնվածները» պետք է մինչև 2031-ի ընտրությունների արդյունքների ամփոփումը բանտում լինեն։ Հակառակ դեպքում, ըստ Փաշինյանի, դատաիրավական համակարգը գործում է ընդդեմ պետությամբ և պետությունը պետք է արձագանքի։
«Պիտի պատասխան տան, որովհետև ինչ է նշանակում բռնել ու արդարացնել Գագիկ Ծառուկյանին ընտրակաշառքի գործով։ Որևէ մեկն ուզում ա ասի, որ որևէ մեկը Գագիկ Ծառուկյանին բռնելա ձրի արդարացրելա՞։ Ես համակարգին եմ մեղադրում կոռումպացված լինելու մեջ։ Կոռումպացվածները կարող են ցանկացած հարց այսօր լուծել դատական համակարգում»,- ասաց վարչապետը։
Նիկոլ Փաշինյանի համոզմամ՝ առանց ընտրակաշառքի «Ուժեղ Հայաստան» դաշինքը, «Հայաստան» դաշինքը և «Բարգավաճ Հայաստան» կուսակցությունը չէին հաղթահարի խորհրդարան անցնելու շեմը։
«Ինչ վերաբերում է պատերազմի եռագլուխ կուսակցությանը՝ առանց ընտրակաշառքի նրանցից ոչ մեկը խորհրդարան անցնելու շեմը չէր հաղթահարի»,- ասաց Փաշինյանը։
