news.am ՄԱԿ-ի գլխավոր քարտուղար Անտոնիու Գուտերեշը ողջունում է ԱՄՆ-ի և Իրանի միջև ձեռք բերված համաձայնագիրը և հույս է հայտնում, որ կողմերը կկրկնապատկեն իրենց ջանքերը հակամարտության վերջնական լուծման համար, ասվում է ՄԱԿ-ի գլխավոր քարտուղարի գրասենյակի հայտարարության մեջ։
«Գլխավոր քարտուղարը ողջունում է այն հայտարարությունը, ըստ որի՝ Միացյալ Նահանգները և Իրանը պայմանավորվել են խաղաղ համաձայնագրի շուրջ, որը նախատեսում է անհապաղ և մշտական հրադադար, Հորմուզի նեղուցի բացում, ինչպես նաև հետագա բանակցությունների ձևաչափ։ Սա կարևոր քայլ է հակամարտության խաղաղ կարգավորման ճանապարհին», – նշվում է հայտարարության մեջ։
Ըստ հայտարարության տեքստի՝ Գուտերեշը նաև շնորհակալություն է հայտնել Պակիստանին, Կատարին, Եգիպտոսին, Սաուդյան Արաբիային, Թուրքիային և տարածաշրջանի մյուս երկրներին՝ բանակցություններին աջակցելու գործում նրանց կառուցողական դերի համար։
ՄԱԿ-ի գլխավոր քարտուղարը հույս է հայտնել, որ կողմերը «կօգտագործեն այս նոր խթանը և կկրկնապատկեն իրենց ջանքերը հակամարտության վերջնական կարգավորման համար»։
Նրա խոսքով՝ ՄԱԿ-ը պատրաստ է աջակցություն ցուցաբերել տևական խաղաղության հասնելու համար։
Հիշեցնենք՝ Վաշինգտոնն ու Թեհրանը շրջանակային համաձայնագիր են ձեռք բերել, որը կդադարեցնի Մերձավոր Արևելքում ռազմական գործողությունները, կվերաբացի Հորմուզի նեղուցը և կվերացնի իրանական նավահանգիստների ամերիկյան շրջափակումը։ Ակնկալվում է, որ ԱՄՆ-ի և Իրանի ներկայացուցիչները հունիսի 19-ին Շվեյցարիայում կստորագրեն փոխըմբռնման հուշագիր։
