Արդարադատության նախարարի տեղակալ Աննա Կարապետյանը բացման խոսքով է հանդես եկել «Էլեկտրոնային նոտարիատ և նոտարական գործունեության թվայնացում» թեմայով միջազգային կլոր-սեղան քննարկմանը, որը կազմակերպվել էր 2026 թվականին ԱՊՀ մասնակից պետությունների արդարադատության նախարարների խորհրդում Հայաստանի Հանրապետության նախագահության շրջանակներում՝ ՀՀ նոտարական պալատի հետ համագործակցությամբ: Այս մասին հայտնում են նախարարությունից։
«Նախարարի տեղակալն ընդգծել է, որ թվայնացումը ներկայում իրավական համակարգերի գործունեության անբաժանելի մասն է՝ նպաստելով գործընթացների թափանցիկությանը և օպերատիվությանը: Նա կարևորել է նոտարական համակարգի թվային փոխակերպումը՝ շեշտելով նաև դրա ազդեցությունը քաղաքացիներին մատուցվող ծառայությունների արդյունավետության բարձրացման վրա:
Կլոր-սեղանին մասնակցել են Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի արդարադատության նախարարությունների և նոտարական պալատների ներկայացուցիչներ, որոնք հանդես են եկել թեմատիկ զեկույցներով։
Քննարկումների ընթացքում անդրադարձ է կատարվել նոտարական գործունեության թվային վերափոխման առանցքային հարցերին, մասնավորապես՝ էլեկտրոնային գրանցամատյանների ներդրմանը, հեռավար նոտարական ծառայությունների զարգացմանը և թվային գործիքների նկատմամբ հանրային վստահության բարձրացմանը։
Միջոցառման կազմակերպումն ու անցկացումը բարձր են գնահատվել մասնակիցների, ինչպես նաև ԱՊՀ մասնակից պետությունների արդարադատության նախարարների խորհրդի քարտուղարության կողմից»,-նշված է հաղորդագրության մեջ:
