news.am Հայաստանի իշխանությունները լրացուցիչ արտոնությունների տրամադրմամբ կաջակցեն տեղական ջերմոցային տնտեսություններին։ Այս մասին Կառավարության հունիսի 18-ի նիստում հայտարարել է էկոնոմիկայի նախարար Գևորգ Պապոյանը։
Նրա խոսքով՝ այս քայլն ուղղված է դեպի Ռուսաստան հայկական արտադրանքի արտահանման արգելքի հետևանքով առաջացած խնդիրների մեղմմանը։ «Աջակցության գործող ծրագրերի շրջանակում նախորդ տարիներին կնքվել է 20 պայմանագիր. հիմնվել կամ հիմնման փուլում են գտնվում ընդհանուր 91,5 հեկտար տարածքով ջերմոցներ, որոնցից 34,5 հեկտարն արդեն գործարկվել է և այս տարի տվել իր արտադրանքը»,- ասել է նախարարը։
Պապոյանը հայտնել է, որ եթե մինչև հուլիսի 1-ը իրականացվող մոնիթորինգի արդյունքում պարզվի, որ ջերմոցը կառուցված է, արտադրել ու իրացրել է գյուղմթերք, ապա տվյալ տնտեսվարողի համար վարկի առավելագույն ժամկետը (որն այժմ 8 տարի է) կերկարաձգվի ևս 6 ամսով։ Բացի այդ, նախատեսված 12-ամսյա արտոնյալ ժամանակահատվածից զատ, կտրամադրվի ևս 6 ամիս լրացուցիչ ժամկետ՝ վարկի մայր գումարի և տոկոսագումարների վճարումների հետաձգման համար։
Էկոնոմիկայի նախարարը ներկայացրել է նաև արտահանման ծավալների վերաբերյալ վերջին տվյալները։ Մասնավորապես՝ հունիսի 1-ից 17-ն ընկած ժամանակահատվածում Հայաստանից արտահանվել է 411 տոննա ջերմոցային բանջարեղեն և ելակ, շուրջ 1,8 միլիոն հատ ծաղիկ և 17 տոննա ծաղկային արտադրանք։
Արտահանումն իրականացվել է հետևյալ երկրներ՝ Վրաստան, Ուզբեկստան, Արաբական Միացյալ Էմիրություններ, Իրան, Ուկրաինա, Բուլղարիա, Կիպրոս, Լատվիա, Ռումինիա, Չեխիա, Ավստրիա, Նիդերլանդներ, Ֆրանսիա, Բելառուս և Ղազախստան։
