Ամերիկյան պետությունների կազմակերպության (OAS) Գլխավոր ասամբլեայի 56-րդ տարեկան նստաշրջանի շրջանակում դեսպան Նարեկ Մկրտչյանը մասնակցել է OAS անդամ պետությունների պատվիրակությունների ղեկավարների, գլխավոր քարտուղարի և կազմակերպությունում դիտորդի կարգավիճակ ունեցող պետությունների պատվիրակությունների ղեկավարների միջև կայացած երկխոսությանը։ Այս մասին տեղեկացնում են ԱՄՆ-ում ՀՀ դեսպանությունից:
Հայաստանի կողմից ներկայացված հայտարարության շրջանակում ընդգծվել է տարածաշրջանային փոխկապակցվածության խթանմանն ուղղված նախաձեռնությունների, խաղաղության օրակարգի, ինչպես նաև Ամերիկյան երկրների հետ տնտեսական, տեխնոլոգիական և այլ ուղղություններով համագործակցության ընդլայնման ուղղությամբ իրականացվող քայլերի կարևորությունը։
Միաժամանակ վերահաստատվել է Հայաստանի հանձնառությունը ժողովրդավարության, անվտանգության և կայուն զարգացման սկզբունքներին՝ ընդգծելով OAS-ի անդամ և դիտորդ պետությունների հետ գործընկերության հետագա ամրապնդման նշանակությունը։
