arm.sputniknews.ru Գյումրու ավագանու «Մայր Հայաստան» խմբակցության ղեկավար Կարեն Սիմոնյանի տանը կատարված խուզարկությունից հետո իրավապահներն առգրավել են ընտանիքի բոլոր անդամների հեռախոսները։ Նա այդ մասին ասաց լրագրողների հետ զրույցում։
Առավոտյան հայտնի դարձավ, որ ՀՀ հակակոռուպցիոն կոմիտեն խուզարկություն է իրականացնում Գյումրու ավագանու «Մայր Հայաստան» խմբակցության ղեկավար Կարեն Սիմոնյանի տանը։ ՀՀ հակակոռուպցիոն կոմիտեից Sputnik Արմենիային հայտնեցին, որ խուզարկությունն իրականացվում է «Հայաստան» դաշինքի համակիրների կողմից ընտրակաշառք տալու, ստանալու դեպքերի առթիվ նախաձեռնված քրեական վարույթի շրջանակում։
Սիմոնյանի խոսքով՝ խուզարկությունը տևել է շուրջ երկուսուկես ժամ, փնտրել են զենք-զինամթերք, տարբեր կրիչներ, փաստաթղթեր, բայց միայն 1 նոթատետր են տարել։
«Ոչ մի բան չեն հայտնաբերել, չէին էլ կարող հայտնաբերել»,- ասաց Սիմոնյանը` հավելելով, որ խուզարկել են նաև իր ավտոմեքենան
Նա նշեց, որ ինքը որևէ կարգավիճակ չունի։
Հունիսի 22-ին ՀՀ հակակոռուպցիոն կոմիտեն ենթադրյալ ընտրակաշառքի վերաբերյալ հերթական ձայնագրությունն էր հրապարակել, որում հեռախոսազրույցի ժամանակ նշվում էր նաև Կարեն Սիմոնյանի անունը։
