ՀՀ Ազգային ժողովի արտահերթ նիստում քննարկվում է ՀՀ ընտրական օրենսգրքում և «Հանրաքվեի մասին» օրենքում փոփոխություններ և լրացումներ կատարելու մասին օրենքների նախագծերը:
Դրանք հեղինակել են ԱԺ «Քաղաքացիական պայմանագիր» խմբակցության պատգամավոր Ալխաս Ղազարյանը, Արուսյակ Մանավազյանը, Հասմիկ Հակոբյանը, Արուսյակ Ջուլհակյանը:
Նախագիծն ԱԺ-ում ներկայացրեց Ալխաս Ղազարյանը:
Ի սկզբանե առաջարկվում էր սահմանել վերջին մեկ տարվա ընթացքում 6 ամիս և ավելի Հայաստանում փաստացի գտնվելու հանգամանքը:
Սակայն, Ալխաս Ղազարյանը նշեց, որ ընդլայնել են ժամկետը, և առաջարկվում է սահմանել, որ ԱԺ ընտրություններին և հանրաքվեներին ընտրելու իրավունք ունենան այն քաղաքացիները, որոնք քվեարկության օրվան նախորդող 48-րդ օրվա դրությամբ, իսկ արտահերթ ընտրության դեպքում՝ նախորդող 28-րդ օրվա դրությամբ դրան նախորդող 2 տարվա ընթացում ՀՀ-ում փաստացի գտնվել են 1 տարուց ավելի:
Ալխաս Ղազարյանը նշեց, որ բացառություն են այն դեպքերը, երբ բացակայությունը պայմանավորված է եղել ՀՀ հանրային ծառայության մեջ գտնվող անձի ծառայողական նպատակներով արտերկրում գտնվելու, ՀՀ դիվանագիտական և հյուպատոսական ներկայացուցչություններում անձի ընտանիքի անդամի, այդ անձի հետ արտերկրում բնակվելու, ինրպես նաև արտերկրի բուհերում ուսումնառության հանգամանքներով:
ԱԺ «Հայաստան» խմբակցությունից Գեղամ Մանուկյանը հարց ուղղեց բացառությունների վերաբերյալ, մասնավորապես՝ նշելով սպորտի բնագավառի անձանց քվեարկելու իրավունքի մասին:
Ալխաս Ղազարյանը նշեց, որ քննարկվում են բացառությունների ցանկն ընդլայնելու հարցերը, սակայն ցանկացախ օբյեկտիվ հանգամանքի դեպքում քաղաքացին կարող է դիմել և վերականգնել իր ընտրելու իրավունքը: Գեղամ Մանուկյանը հետաքրքրվեց, թե ով է որոշելու բացառությունները՝ նշելով, որ իշխանությունը դա դարձնում է կամայական, ինչի հետ, սակայն, Ալխաս Ղազարյանը չհամաձայնեց:
