Դատախազությունը պահանջում է Հայաստանի Հանրապետությանը վերադարձնել Սևանի ափամերձ տարածքում «Մուլտի գրուպ» կոնցեռն ՍՊԸ-ի ապօրինի տիրապետության ներքո գտնվող բնակելի տներն ու շենք-շինությունները։ Այդ մասին տեղեկացրել է Գլխավոր դատախազությունը։
Ըստ աղբյուրի՝ Հակակոռուպցիոն դատարանը վարույթ է ընդունել Գլխավոր դատախազության հայցն ընդդեմ «Բեղլու» ՓԲԸ-ի, Պետական գույքի կառավարման կոմիտեի, Գագիկ Ծառուկյանի, «Մուլտի գրուպ» կոնցեռն ՍՊԸ-ի և «Սևան» ազգային պարկ» ՊՈԱԿ-ի՝ 1996 թվականի նոյեմբերի 29-ի N 111-2 պայմանագիրն անվավեր ճանաչելու պահանջով։
Որպես հետևանք՝ Դատախազությունը պահանջում է անվավեր ճանաչել մի շարք գույքերի նկատմամբ գրանցված իրավունքները, այդ թվում՝ 2000 թվականի սեպտեմբերի 8-ին «Բեղլու» ՓԲԸ-ի և Գագիկ Ծառուկյանի միջև կնքված անշարժ գույքի առուվաճառքի պայմանագիրը։ Իրավապահները նաև պահանջում են անվավեր ճանաչել այդ պայմանագրում փոփոխություն կատարելու վերաբերյալ 2001 թվականի հունվարի 12-ի համաձայնագիրը։
Բացի այդ, Դատախազությունը պահանջում է անվավեր ճանաչել 2025 թվականի նոյեմբերի 25-ին գրանցված՝ «Սևան» ազգային պարկ» ՊՈԱԿ-ի և «Մուլտի գրուպ» կոնցեռն ՍՊԸ-ի միջև կնքված վարձակալության պայմանագիրը, ինչպես նաև 2025 թվականի նոյեմբերի 28-ին կատարված իրավունքի պետական գրանցումը։
Դատախազությունը նաև պահանջում է «Մուլտի գրուպ» կոնցեռն ՍՊԸ-ի ապօրինի տիրապետությունից Հայաստանի Հանրապետությանը վերադարձնել 0,29114 հա մակերեսով հողատարածքը, դրա վրա կառուցված 425,12 քմ մակերեսով բնակելի տները, 23,04 քմ մակերեսով նավակայանը և 100,8 քմ մակերեսով պարիսպը։
Նշվում է նաև, որ Հակակոռուպցիոն դատարանը բավարարել է Դատախազության՝ հայցի ապահովման միջոց կիրառելու միջնորդությունը։ Դատարանն արգելել է պատասխանողներին կատարել այնպիսի գործողություններ, որոնք կհանգեցնեն հայցադիմումում նշված գույքերի սեփականատիրոջ փոփոխությանը կամ դրանց փաստացի վիճակի փոփոխությանը։
