armenpress.am ԱՄՆ նախագահ Դոնալդ Թրամփը 50% մաքսատուրք է սահմանել Կանադայից ներմուծվող ապրանքների լայն տեսականու նկատմամբ՝ ի պատասխան Կանադայի կողմից ամերիկյան մեքենաների, կաթնամթերքի և ալկոհոլի նկատմամբ, նրա խոսքով, «անհավասար վերաբերմունքի»։ Այս մասին նշված է համապատասխան հրամանագրերում, որոնք հրապարակել է Սպիտակ տունը։
Ըստ հրամանագրի՝ Կանադան «խտրականության կամ անհիմն և անհավասար սահմանափակումների միջոցով» որոշակի երկրների հետ առևտրին ավելի բարենպաստ է վերաբերվում, քան Միացյալ Նահանգների հետ առևտրին։
Մաքսատուրքերը վերաբերում են ապրանքների լայն շրջանակի՝ սկսած առօրյա սպառողական ապրանքներից, ինչպիսիք են գինին և հոկեյի մականները, մինչև արդյունաբերական ապրանքներ, ինչպիսին է ցեմենտը: Այնուամենայնիվ, մաքսատուրքերը չեն տարածվի մի շարք կարևոր արտահանման ապրանքների վրա, ինչպիսիք են էներգիան, կալիումական պարարտանյութերը, կարևորագույն հանքանյութերը և ձուկը։
ԱՄՆ-ն միևնույն ժամանակ կպահպանի կանադական պողպատի, ալյումինի և պղնձի նկատմամբ գործող 15%-ից 50% տուրքերը։
Սպիտակ տունը հայտարարել է, որ տուրքերն ուժի մեջ կմտնեն 30 օրից: Սա նշանավորում է հյուսիսամերիկյան հարևանների միջև առևտրային լարվածության լուրջ սրացում։ Սպիտակ տունը նաև նշել է, որ մաքսատուրքերն անհրաժեշտ են ամերիկյան բիզնեսը պաշտպանելու համար։
Նոր տուրքերը վերաբերում են բոլոր ներառված ապրանքներին, անկախ նրանից, թե արդյոք ապրանքը ներառված է Կանադայի, ԱՄՆ-ի և Մեքսիկայի միջև գործող ազատ առևտրի համաձայնագրում։ Մասնավորապես, Թրամփը մեղադրում է Կանադային ամերիկյան ավտոմեքենաների և ավտոպահեստամասերի նկատմամբ հարկեր սահմանելու համար, որոնք չեն ընդգրկվում գործող Կանադա-ԱՄՆ-Մեքսիկա ազատ առևտրի համաձայնագրում։
Սպիտակ տան հայտարարությունից հետո Կանադայի վարչապետ Մարկ Քարնին նշել է, որ երկիրը պատրաստ է ակտիվացնել առևտրային բանակցություններն ԱՄՆ-ի հետ առաջիկա շաբաթներին։
«Սա ԱՄՆ միակողմանի առևտրային գործողությունների շարքի վերջին քայլն է, որը սկսվել է ԱՄՆ-ի կողմից մի շարք մաքսատուրքերի սահմանմամբ՝ ուղղակիորեն խախտելով Կանադա-ԱՄՆ-Մեքսիկա համաձայնագիրը», – հայտարարել է Քարնին X-ում գրառման մեջ։
Նա նաև մեջբերել է «Կանադայի ինքնիշխանությանը սպառնացող վտանգները», որով նա, հավանաբար, նկատի ունի Թրամփի կոչերը Կանադան ԱՄՆ 51-րդ նահանգը դարձնելու վերաբերյալ։ Քարնին շեշտել է, որ Կանադայի նահանգները, տարածքները և կանադացիները կանգնած են կողք-կողքի և համապատասխան գործողություններ են ձեռնարկում երկրի տնտեսությունը, բիզնեսները, ընտանիքները, աշխատողներին և գյուղացիներին պաշտպանելու ուղղությամբ։
Մաքսատուրքերի սահմանումը հաջորդել է նախագահ Թրամփի սպառնալիքին՝ պատժամիջոցներ սահմանելու Կանադայում մոլեգնող անտառային հրդեհների ծխի համար, որը հասել է ամերիկյան քաղաքներ։
«Միացյալ Նահանգները անտեղի ողողված է կեղտոտ, անառողջ օդով», – ասել է Թրամփը։
Այնուամենայնիվ, Թրամփի կողմից ստորագրված կատարողական հրամանագրերում անտառային հրդեհների մասին որևէ հիշատակում չկա։
