armenpress.am Հնդկաստանի արտաքին գործերի նախարարությունը կանչել է Ռուսաստանի գործերի ժամանակավոր հավատարմատար Վլադիմիր Լադանովին և մտահոգություն հայտնել հրթիռային հարվածի հետևանքով Հնդկաստանի քաղաքացի հանդիսացող չորս նավաստու զոհվելու կապակցությամբ։ Այս մասին հաղորդում է Reuters գործակալությունը։
Ըստ ԱԳՆ հայտարարության՝ Լադանովին խնդրել են փոխանցել Հնդկաստանի խորը մտահոգությունները և ասել են, որ առևտրային նավերի թիրախավորումը և դրա հետևանքով քաղաքացիական անձանց կյանքի կորուստն «անընդունելի» են։
«Նման հարձակումները խաթարում են միջազգային ծովային առևտրի անվտանգությունը, պաշտպանվածությունը և կայունությունը», – հայտարարությունից մեջբերում է Reuters-ը։
Ավելի վաղ Ուկրաինայի իշխանությունները հայտարարել էին, որ Ռուսաստանը հուլիսի 19-ին երեք թևավոր հրթիռ է արձակել Գվինեա-Բիսաուի դրոշով նավարկող Golden Leo նավի վրա, որի տախտակամածին գտնվում էին հնդիկ և սիրիացի անձնակազմի անդամներ։ Հարվածների հետևանքով զոհվել է 10 մարդ, այդ թվում՝ Հնդկաստանի 4 քաղաքացի։ Golden Leo-ն պատկանում է Մումբայում տեղակայված ընկերության։
Նավը հարձակման է ենթարկվել Օդեսայից եգիպտացորենի բեռով դուրս գալու ժամանակ, հայտնել է Օդեսայի տարածաշրջանային ռազմական վարչակազմի ղեկավար Օլեգ Կիպերը։
Վերջին ամիսներին ԱՄՆ-Իրան հակամարտության ընթացքում ևս հնդիկ նավաստիներ են զոհվել, և Հնդկաստանը բողոք է հայտնել ինչպես Վաշինգտոնին, այնպես էլ Թեհրանին։
