Երևանի Ավան և Դավթաշեն վարչական շրջաններում ոչ նախատեսված վայրերում կատարվող առևտրի կետերից առգրավվել են տարբեր ապրանքներ։ Տեղեկությունը հայտնում է Երևանի քաղաքապետարանի մամուլի ծառայությունը։
Նշվում է, որ Երևանի քաղաքապետարանի աշխատակազմի հասարակական կարգի պահպանության ծառայության կողմից այս վարչական շրջաններում ոչ սահմանված և ոչ նախատեսված վայրերում առևտրի իրականացման համար կազմվել են համապատասխան արձանագրություններ և կազմակերպել առգրավման գործընթաց։
Արդյունքում, Ավան վարչական շրջանում առգրավվել է մոտ 3 տոննա 200 կգ տարբեր ապրանքատեսականի, ինչպես նաև թվով 300 ծաղիկ։
Դավթաշեն վարչական շրջանում քաղաքապետարանի աշխատակիցներն առգրավել են մոտ 3 տոննա 600 կգ ապրանքատեսականի։
Երևանի քաղաքապետարանից զգուշացնում են, որ միջոցառումները կրելու են շարունակական բնույթ:
