ՀՀ քաղաքաշինության, տեխնիկական և հրդեհային անվտանգության տեսչական մարմնի մասնագետները ստուգում են իրականացրել Երևանի Դավթաշեն 4-րդ թաղամասի 32 հասցեում գործող «Ծիրան մարկետ» ՍՊԸ-ի սուպերմարկետում։
Ստուգման արդյունքում առևտրային սրահում և պահեստային հատվածում հայտնաբերվել են հրդեհային անվտանգության նորմատիվ պահանջների շուրջ երկու տասնյակ խախտումներ։
Առևտրի սրահում արձանագրված խախտումների մասով տեսչական մարմինը կարգադրագիր է տվել՝ դրանք սահմանված սեղմ ժամկետում վերացնելու պահանջով։
Պահեստային հատվածում արձանագրված խախտումների ռիսկայնությունն ու վտանգավորությունը հաշվի առնելով՝ տեսչական մարմնի ղեկավարի որոշմամբ ամբողջությամբ կասեցվել է պահեստի շահագործումը՝ մինչև խախտումների վերացումը։
Որոշման հիման վրա Հարկադիր կատարումն ապահովող ծառայությունում հարուցված կատարողական վարույթի շրջանակում պահեստը կապարակնքվել է։
