shantnews.am Հայաստանը դե ֆակտո չի մասնակցում ՀԱՊԿ-ի շրջանակում անցկացվող քննարկումներին, սակայն դե յուրե շարունակում է մնալ կազմակերպության անդամ։ Այս մասին ՏԱՍՍ-ին տված հարցազրույցում հայտարարել է ՀԱՊԿ գլխավոր քարտուղար Թաալաթբեկ Մասադիկովը։
«Մենք այս հարցը վաղուց ենք քննարկում։ Այսօր Հայաստանը դե ֆակտո չի մասնակցում ՀԱՊԿ-ի շրջանակում հարցերի քննարկմանը, չի ուղարկում իր աշխատակիցներին և զինծառայողներին ՀԱՊԿ-ի քարտուղարությունում քվոտային պաշտոններ զբաղեցնելու համար, ինչպես նաև արդեն երրորդ տարին է՝ չի վճարում անդամավճարները։ Սակայն դե յուրե Հայաստանը շարունակում է մնալ Հավաքական անվտանգության պայմանագրի կազմակերպության անդամ»,- նշել է նա։
Մասադիկովի խոսքով՝ Հայաստանը լուրջ ներդրում է ունեցել ՀԱՊԿ-ի զարգացման գործում, իսկ հայ ժողովուրդը տարբեր ժամանակաշրջաններում աջակցել է երկրի ղեկավարության նախաձեռնություններին։
Ավելի վաղ վարչապետ Նիկոլ Փաշինյանը խորհրդարանի ամբիոնից հայտարարել էր, որ կողմ է Հայաստանի՝ ՀԱՊԿ-ից հեռացմանը և գոհ կլինի, եթե դա տեղի ունենա։ Նրա խոսքով՝ այդ դեպքում Երևանը կազատվի կազմակերպությունից դուրս գալու կամ չգալու երկընտրանքից։
