news.am Մարիամրոբա տոնի (Սուրբ Աստվածածնի Վերափոխման) առթիվ Վրաստանի նախագահ Միխայիլ Կավելաշվիլին ներում է շնորհել 226 բանտարկյալի։
Պետության ղեկավարի վարչակազմի տեղեկությամբ՝ ներումը վերաբերել է ազատազրկման դատապարտված 217 անձի և կալանքի հետ չկապված պատիժներ կրող 6 անձի, 3 անձանց դատվածությունը հանվել է։
«Վրաստանի նախագահի բացառիկ սահմանադրական լիազորությունների իրականացումը հիմնված է հումանիզմի սկզբունքի և պետական շահերի վրա», – նշվել է հայտարարությունում։
2019 թվականին ներում շնորհելու կարգը փոխել է Վրաստանի հինգերորդ նախագահ Սալոմե Զուրաբիշվիլին։ Ներման հանձնաժողովը լուծարվել է, և այդ ժամանակից ի վեր դատապարտյալների գործերի նյութերը պետության ղեկավարի կողմից քննարկման համար պատրաստում է նախագահի վարչակազմի համապատասխան մասնագիտացված ծառայությունը։
Որոշում կայացնելիս նախագահը պարտավոր է հաշվի առնել դատապարտյալի անձը, կատարված հանցագործության շարժառիթն ու հանգամանքները, առողջական վիճակը և ընտանեկան դրությունը, տարիքը, կրած պատժի ժամկետը, վարքագիծն ու մեղքի գիտակցումը, ինչպես նաև տուժած կողմի դիրքորոշումն ու այլ ուղեկցող գործոններ։
