azatutyun.am Շաբաթ ուշ երեկոյան կայացած առանձին հեռախոսազրույցների ընթացքում Իրանի արտգործնախարար նախարար Աբբաս Արաղչին, Սաուդյան Արաբիայի ԱԳ նախարար Ֆեյսալ բին Ֆարհանը և Թուրքիայի ԱԳ նախարար Հաքան Ֆիդանը քննարկել են երկկողմ հարցերը, տարածաշրջանային զարգացումները և տարածաշրջանում կայունությունը վերականգնելուն ուղղված վերջին դիվանագիտական ջանքերը, հայտնում է իրանական IRNA-ն:
Հաղորդվում է, որ բանակցությունների ընթացքում անդրադարձ է կատարվել նաև Հորմուզի նեղուցում ստեղծված իրավիճակին:
Ավելի վաղ ԱՄՆ փոխնախագահ Ջեյ Դի Վենսը հայտարարել էր, որ Վաշինգտոնը չի պատրաստվում բանակցել Թեհրանի հետ, քանի դեռ իրանական ուժերը չեն դադարեցրել Հորմուզի նեղուցում առևտրային նավերի վրա հարձակումները:
«Դուք պետք է դադարեք կրակել առևտրային նավերի վրա: Ամեն ինչ այնքան պարզ է… Նախագահը շատ հստակ է եղել. մենք չենք բանակցելու նրանց հետ: Չենք բանակցելու, մինչև չդադարեն առևտրային նավերի վրա կրակել»,- ասել էր փոխնախագահը։
