factor.am Ամենայն հայոց կաթողիկոս Գարեգին Բ Ներսիսյանի պաշտպան Արա Զոհրաբյանն այսօրվա դատական նիստին միջնորդեց կաթողիկոսի նկատմամբ քրեական հետապնդումը դադարեցնել:
Ըստ Արա Զոհրաբյանի՝ կաթողիկոսի մեղադրանքի հիմքում Գևորգ Սարոյանին կարգալույծ անելու հոգևոր խորհրդի որոշումն է, իսկ այս որոշումը կամ եկեղեցական տերմինով՝ հայրապետական տնօրինությունը, չի կարող դատական ակտի կատարումը խոչընդոտելուն միտված լինել:
Խոսելով եկեղեցու՝ պետությունից անջատ գործելու սահմանադրական երաշխիքի մասին՝ Արա Զոհրաբյանը նշեց, որ պետությունը չի կարող միջամտել եկեղեցու գործերին, նշեց, որ առկա էր քրեական հետապնդումը բացառող հանգամանք և միջնորդեց դադարեցնել կաթողիկոսի նկատմամբ քրեական հետապնդումը կամ դիմել Սահմանադրական դատարան:
