ՀՀ ներքին գործերի նախարարությունը շրջանառության մեջ է դրել օրենսդրական փոփոխությունների փաթեթ, որով առաջարկվում է ոստիկանության և փրկարար ծառայության համար ներդնել մասնագիտական կադրերի պատրաստման և կարիերային առաջխաղացման նոր մոդել։ Այս մասին հաղորդագրություն է տարածել ՀՀ ՆԳ նախարարությունը։
Պետական պատվերով միջին մասնագիտական կրթական ծրագիրն ավարտած անձինք կնշանակվեն ոստիկանության կամ փրկարար ծառայության միջին խմբի պաշտոններում՝ ՆԳՆ-ում կամ ենթակա պետական մարմիններում առնվազն 10 տարի անընդմեջ ծառայելու պայմանով։
Նախագծով նախատեսվում է, որ ուսման և անընդմեջ ծառայության ընթացքում պետության առջև ստանձնած պարտավորություններն ամբողջությամբ կատարած անձանց պարտադիր ժամկետային զինվորական ծառայության անցնելու պարտականությունը կհամարվի իրացված։
ՆԳՆ-ն առաջարկում է նաև ներդնել մասնագիտական և ծառայողական առաջխաղացման փուլային մեխանիզմ։
Նախարարության գնահատմամբ՝ փոփոխությունները հնարավորություն կտան դեռևս հանրակրթությունն ավարտելու փուլում ոստիկանության կամ փրկարար ծառայության ոլորտով հետաքրքրված երիտասարդներին ընտրել համապատասխան մասնագիտական կրթական ուղի և հետագայում շարունակել ծառայությունը համակարգում։
